Búgin Qarýly kúshterde jańa oqý jyly bastaldy
ASTANA. KAZINFORM — Bir apta boıy áskerı basqarý organdarynda, quramalar men áskerı bólimderde jeke quramnyń jaýyngerlik daıarlyq daǵdylaryn jetildirýge arnalǵan taktıkalyq-qurylymdyq sabaqtar ótedi. Bul týraly Qorǵanys mınıstrligi málim etti.
Vedomstvonyń málimetinshe, sabaq barysynda urys eseptoptary men kezekshi qyzmetterdiń is-áreketi naqtylanyp, shtabtar men áskerı bólimderdiń basqa áskerler men quralymdar, odan bólek memlekettik organdarmen ózara árekettestigi pysyqtalady.
— Oqý dabylynan keıin barlyq áskerı bólimder eń joǵary dárejedegi jaýyngerlik daıyndyqqa kóshedi. Áskerı qyzmetshiler tehnıkalarmen oqý polıgondaryna jáne oqý ortalyqtaryna marsh jasaıdy. Keıbir bólimder áýe jáne temir jol kóligimen jolǵa shyǵady, — delingen habarlamada.
Qazirgi ýaqytta jumyldyrý resýrstaryn qabyldaý pýnktterin ashýǵa daıyndyq júrgizilip jatyr. Quramalar men bólimderdiń praktıkalyq áreketi ádettegideı jiti nazarda bolmaq. Taktıkalyq-saptyq keshendi sabaqtar 7 jeltoqsanǵa deıin jalǵasady.
Eske sala keteıik, jańa oqý jylynyń bastalýyna baılanysty jeltoqsan aıynyń alǵashqy kúnderinde Qarýly Kúshterdiń barlyq bólimi oqý dabyly boıynsha joǵary deńgeıdegi jaýyngerlik daıyndyqqa keltiriletinin jazǵan edik.