1 aqpan — Azamattyq avıatsııa qyzmetkerleri kúni
ASTANA. KAZINFORM — 1 aqpan — Azamattyq avıatsııa qyzmetkerleri kúni jáne Qazaqstandaǵy avıatsııalyq qaýipsizdik qyzmeti kúni Qazaqstandyq avıatorlar jyl saıyn joǵary eńbek nátıjelerin kórsetýde.
2024 jyldyń qorytyndysy boıynsha qazaqstandyq áýe kompanııalary 14,7 mln jolaýshy tasymaldady, bul 2023 jylǵy kórsetkishten (13,3 mln jolaýshy) 11%-ǵa artyq, ishki áýejaılar 29,7 mln adamǵa qyzmet kórsetti, bul byltyrǵy kórsetkishten (26,1 mln adam) 14%-ǵa artyq.
Jolaýshylar aǵynynyń turaqty ósýi — búkil álem azamattarynyń qazaqstandyq avıatsııanyń avıatsııalyq qaýipsizdik pen ushý qaýipsizdigi deńgeıine seniminiń dáleli. Búgingi tańda qazaqstandyq áýe kompanııalarynyń ushaqtar parki 104 ushaqtan turady. 2025 jyldyń sońyna qaraı bul kórsetkish 118 áýe kemesine deıin artady, bul jolaýshylar úshin ishki jáne halyqaralyq tasymaldaýdyń qoljetimdiligi men jaılylyq deńgeıin jaqsartady.
Áýe kóligi ınfraqurylymyn jańǵyrtý aıasynda 2024 jyly Almaty, Qyzylorda jáne Shymkent qalalarynyń áýejaılarynda 3 jańa jolaýshylar termınalynyń qurylysy aıaqtalyp, respýblıkadaǵy 8 áýejaıdyń aerodrom betkeılerine jóndeý jumystary júrgizildi.
2024 jyly 22 halyqaralyq áýe baǵyty ashyldy jáne qaıta iske qosyldy, onyń ishinde: Almaty — Mýmbaı, Almaty — Irkýtsk, Shymkent — Fý-Kýok, Astana — Sıanýkvıll, Almaty — Sıanýkvıll, Aqtóbe — Sharm-el-Sheıh, Almaty — El-Alameın, Astana — Fý-Kýok, Shymkent — Jıdda, Astana — Phýket, Atyraý — Dýbaı, Almaty — Fý-Kýok. Astana — Dýshanbe, Astana — Baký, Astana — Praga, Astana — Seýl, Almaty — Medına, Almaty — Beıjiń, Almaty — Kýala-Lýmpýr, Astana — Ábý-Dabı, Almaty — Ábý-Dabı, Aqtaý — Mıneraldy sý.
Qazaqstannyń Halyqaralyq azamattyq avıatsııa uıymynyń (IKAO) standarttaryna sáıkestik deńgeıi 82% quraıdy, bul aldyńǵy qatarly Eýropa elderiniń deńgeıimen salystyrýǵa bolady. Qazaqstandyq áýe kompanııalarynyń Eýroodaq elderine ushýyna eshqandaı shekteýler joq.
Qazirgi ýaqytta Qazaqstannyń azamattyq avıatsııasynda 25 myńnan astam adam jumys isteıdi. Avıator mamandyǵyna degen qyzyǵýshylyq jyl saıyn artyp keledi. Avıatsııa tek ushqyshtar men bortserikter ǵana emes, ol áýe kóliginiń qaýipsizdigi men tıimdiligin qamtamasyz etetin ártúrli mamandar men tehnologııalardyń úlken kesheni. Qazaqstanda 2025 jyl el Prezıdenti Qasym-Jomart Toqaevtyń jarlyǵymen «Jumysshy mamandyqtary jyly» dep jarııalandy. Nazarda avıatsııa salasynyń myńdaǵan ınjenerler, avıatsııalyq tehnıkter, áýejaı jerústi ekıpajdary, dıspetcherler, janarmaı tasymaldaýshylar jáne avıatsııanyń úzdiksiz jáne qaýipsiz jumysyn qamtamasyz etetin basqa da mamandar bolady.
— Búgin, 1 aqpanda Qazaqstannyń avıatsııalyq qaýipsizdik qyzmetiniń qyzmetkerleri de kásibı merekelerin atap ótýde. Dástúr boıynsha bul kúni avıatsııa salasynyń qazirgi qyzmetkerleri men ardagerlerine qurmet kórsetiledi. Aıta keteıik, bıyl Qazaqstan Halyqaralyq azamattyq avıatsııa uıymynyń (IKAO) avıatsııalyq qaýipsizdik aýdıtinen ótedi. Kásibı merekede qazaqstandyq avıatorlarǵa densaýlyq, jumystaryna tabys, jańa jetistikter, otbasylaryna amandyq tileımiz! Sizdiń tynymsyz eńbegińiz ben kásibı sheberligińizdiń arqasynda azamattyq avıatsııa damýdyń jańa kókjıekterin baǵyndyra bersin. Mereke kúni qutty bolsyn!, — delingen azamattyq avıatsııa komıtetiniń habarlamasynda.
Osyǵan deıin 30 qańtarda áskerı topograftardyń kásibı merekesi bolǵanyn jazǵan edik.