Jumystan bosatylǵan Astana mektebiniń dırektory jańa qyzmetke taǵaıyndaldy

Bir jyl boıy oqýshylarǵa sabaq ótkizbegeni úshin jumysynan bosatylǵan Astanadaǵy mekteptiń dırektory jańa qyzmetke taǵaıyndaldy, dep habarlaıdy QazAqparat tilshisi qalalyq Bilim basqarmasynyń baspasóz qyzmetine silteme jasap.

«Muhametjanova Araı Áýkenqyzy qazirgi ýaqytta S. Máýlenov atyndaǵy №37 mektep-lıtseıinde oqý jónindegi dırektordyń orynbasary bolyp jumys isteıdi. «Bilim týraly» Qazaqstan Respýblıkasy Zańynyń 43-baby 1-tarmaǵyna sáıkes bilim berý uıymdary oqý-tárbıe protsesin uıymdastyrýda, kadrlardy irikteý men ornalastyrýda, ǵylymı, qarjy-sharýashylyq jáne ózge de qyzmetti júzege asyrýda derbes sanalady», - delingen resmı habarlamada.

Aqparatta aıtylǵandaı, burynǵy mektep dırektoryn jumysqa qabyldaý Oqý-aǵartý mınıstriniń (burynǵy Bilim jáne ǵylym mınıstrligi) 2012 jylǵy 21 aqpandaǵy № 57 buıryǵyna sáıkes, konkýrstyq negizde júzege asyrylǵan.

«Araı Muhametjanova qazaq tili men ádebıeti pániniń muǵalimi, M. Áýezov atyndaǵy Semeı ýnıversıtetin bitirgen. «Pedagog-zertteýshi» biliktilik sanaty bar. Mektep usynǵan aqparat boıynsha ustazdyń barlyq qujaty talaptarǵa saı. Baıqaýǵa qatysqan 48 úmitkerdiń ishinen ol eń joǵary ball jınady», - dep túsindirdi bilim basqarmasynan.

Sondaı-aq muǵalim burynǵy jumys ornynan óz erkimen ketkeni atap ótiledi.

«Búgingi kúni quqyq qorǵaý organdary men sot tarapynan atalǵan azamatqa qatysty shekteýler joq. Qazaqstan Respýblıkasynyń Konstıtýtsııasyna sáıkes ár azamattyń eńbek bostandyǵyna, qyzmet túri men kásibin erkin tańdaýǵa quqyǵy bar», - degen túsinik berildi.

Eske sala keteıik, Astanada jyl boıy oqýshylarǵa sabaq ótkizbegen №49 mekteptiń dırektory jumystan ketkeni týraly habarlaǵan edik. Ol «Abaıtaný», «Qazaq ádebıetindegi esse jazýdyń qurylymy» jáne «Jahandyq quzyrettilik» sııaqty fakýltatıvti sabaqtar úshin aqsha alyp otyrǵan, biraq sabaqty ótkizbegen.