Qazaqstandyq jáne amerıkalyq sarapshylar Ortalyq Azııanyń máselelerin zerttedi
Búgin Astanadaǵy Nazarbaev ýnıversıtetinde 16 jetekshi qazaqstandyq jáne amerıkalyq sarapshy Ortalyq Azııanyń máselelerine arnalǵan Oxus Society-diń «Kazakhstan Future» baǵdarlamasy aıasynda óz zertteý nátıjelerin tanystyrdy, dep habarlaıdy QazAqparat tilshisi.
Atalǵan sharany Nazarbaev ýnıversıtetiniń rektory, doktor Ilesanmı Adesıda ashyp, Kazakhstan Futures baǵdarlamasynyń mańyzdylyǵyna toqtaldy.
«Bizdiń ýnıversıtet kóptegen baǵyt boıynsha, sonyń ishinde el bolashaǵyn qalyptastyratyn Qazaqstan úshin kóshbasshylar qurý baǵytynda jumys júrgizip jatyr. Meniń oıymsha, bul jerde sarapshylar tolyqtyryp ótetin belgili bir alshaqtyqtar bar. Bul halyqaralyq turǵydan Ortalyq Azııa elderi men Qazaqstanǵa qatysty zertteýler. Ortalyq Azııa elderi álemdik talqylaýlarda aldyńǵy qatarda bolýy úshin bizge nátıje kerek. Bul bizdiń mıssııa», - deıdi ýnıversıtet rektory.
Uıymdastyrýshylardyń málimetinshe, jyl basynan beri qazaqstandyq jáne amerıkalyq zertteýshi sarapshylar dekarbonızatsııanyń monoqalalarǵa áseri, Ortalyq Azııada aımaqshyldyqtyń damýy, Qazaqstandaǵy ózgerister sáıkestigin túsiný úshin sanaqtyń mańyzdylyǵy, jasyl energetıka boıynsha halyqaralyq yntymaqtastyq jáne Qazaqstandaǵy teńsizdik máselelerin zerttegen.
«Bıyl aqpanda Vashıngtonda ornalasqan Oxus Society qoǵamy Ortalyq Azııa elderi máselelerin zertteıtin sarapshylardyń basyn qosyp «Kazakhstan Future» baǵdarlamasyn shyǵardy. Maqsat- AQSh pen Qazaqstan arasyndaǵy qarym-qatynasty jaqsartý. Eki eldiń sarapshylary belgili bir másele boıynsha zertteýler júrgizip, sonyń qorytyndysy boıynsha usynymdar jasalady. Osylaısha saıasattyń ózgerýine úles qosý. Meniń taqyrybym halyqaralyq qatynastar, onyń ishinde Ortalyq Azııa elderiniń ózara yntymaqtastyǵy máselesi. Bizdiń zertteý tobynda 3 adam bar, onyń ishinde 2 qazaqstandyq jáne 1 amerıkandyq zertteýshi. Búgingi is-sharada 8 aı boıy jasalǵan jumystyń qorytyndysymen tanystyryp jatyrmyz», - dedi Nazarbaev ýnıversıteti joǵary memlekettik saıasat mektebiniń assıstent professory, zertteýshi Jánibek Arynov.
Onyń aıtýynsha, zertteýlerdiń qorytyndysy Oxus Society qoǵamynyń saıtyna jarııalanady jáne bul baǵyttaǵy jumys jalǵasyn tappaq.
