Tramp ákimshiligi Kýbaǵa qarsy áskerı kúsh qoldanýdy qarastyryp jatyr
ASTANA. KAZINFORM — AQSh prezıdenti Donald Tramp halyqaralyq shıelenis kúsheıip turǵan kezeńde Kýba týraly pikir bildirip, elde «jaqyn arada bılik aýysýy múmkin» ekenin aıtty, dep jazdy Anadoly agenttigi.
Fox News málimetinshe, Tramp bul málimdemelerin Florıda shtatynda sóılegen sózinde aıtqan jáne Kýbaǵa qatysty pikirin ázil sıpatynda jetkizgen.
Ol Kýbany «jaqyn arada óz basqarýyn qolǵa alýy múmkin el» dep atap, onda «birqatar problemalar bar» ekenin qosqan.
— Biz Irannan qaıtyp kelgende, bizdiń zymyrandarymyz, múmkin USS Abraham Lincoln, jaǵalaýda ıakor tastaıdy, sonda olar «Úlken rahmet, biz berildik» deıtin shyǵar», — dep málimdedi.
Onyń sózin tyńdap otyrǵan zalda kúlki estilgen, alaıda Aq úı bul málimdemelerdiń qanshalyqty baıyppen aıtylǵanyn naqtylaǵan joq.
Buǵan deıin, 13 sáýirde Tramp Iranǵa qatysty máselelerden keıin AQSh Kýbaǵa da nazar aýdaratynyn aıtyp, eldi «uzaq jyldar boıy nashar basqarylyp keledi» dep sıpattaǵan jáne Vashıngton keıinirek bul máselemen aınalysýy múmkin ekenin jetkizgen.
Kýba prezıdenti Mıgel Dıas-Kanel buǵan jaýap retinde AQSh-tyń yqtımal áskerı áreketi jaǵdaıynda eldiń qarsylyq kórsetetinin málimdedi: «Eger bul jaǵdaı bolsa, qaqtyǵys bolady, kúres bolady. Biz qorǵanamyz, qajet bolsa — ólemiz», — dedi ol.
Buǵan deıin AQSh prezıdenti Donald Tramp Kýbaǵa qatysty 70 jyl kútken kúnniń týýy alys emes ekenin málimdegen edi.
