Bıyl Almatyda óndiristegi jazataıym oqıǵalardan 4 adam qaıtys boldy

Jyl basynan beri Almatyda óndiriste 59 jazataıym oqıǵa tirkelip, 4 jumysshy kóz jumdy. Bul týraly búgin óńirlik kommýnıkatsııalar qyzmetiniń brıfınginde qalalyq eńbek ınspektsııasynyń basshysy Erkinbek Ámirǵalıev málim etti, dep habarlaıdy QazAqparat tilshisi.

«Megapolıste óndiriske baılanysty 59 jazataıym oqıǵa tirkeldi. Osy jaǵdaılardyń saldarynan 4 adam qaıtys bolyp, 26 jumysshy aýyr, 30-y jeńil jaraqat aldy»,- dedi spıker.

Sonymen qatar, ol Almaty qalasynyń eńbek ınspektorlary 45,3 mln teńge somasyna 321 zańdy tulǵany jaýapqa tartqanyn atap ótti.

«Jyl basynan beri azamattardyń eńbek quqyqtaryn qorǵaý maqsatynda jospardan tys 522 tekserý júrgizildi. Osy tekserýler barysynda eńbek zańnamasy normalarynyń 783 buzýshylyǵy anyqtalyp, zań buzýshylyqtardy joıý týraly 387 uıǵarym berildi. Jeke jáne zańdy tulǵalardyń 3 903 ótinishi qaraldy, bul azamattar men uıymdardyń eńbek quqyqtaryn qorǵaý máseleleri boıynsha belsendiliginiń joǵary ekendigin kórsetedi», - dedi Erkinbek Ámirǵalıev.

Spıkerdiń málimetinshe, 285-ten astam kásiporynda 708,7 mln teńgege jalaqy boıynsha bereshek óteldi, bul 1 231 qyzmetkerdiń eńbek quqyǵyn qorǵaýǵa múmkindik berdi. Alaıda, eki kásiporynda 182 qyzmetker aldynda 97,5 mıllıon teńge somasynda aǵymdaǵy bereshek qalyp otyr.

«Qala kásiporyndarynda jasalǵan 27 698 ujymdyq sharttyń monıtorıngi men tirkelýi júzege asyryldy. Jyl basynan bastap 155 ujymdyq shart jasaldy», - dep tolyqtyrdy ol.

Memlekettik organnyń málimetinshe, Almatyda barlyǵy 110 myńnan astam kásiporyn jumys isteıdi, onda 900 myńǵa jýyq jaldamaly jumysshy jumys isteıdi.