Sheteldik kózderden aqsha alyp otyrǵan qazaqstandyqtar men uıymdar anyqtaldy
Memlekettik kirister komıteti bıylǵy birinshi jartyjyldyqta sheteldik kózderden aqsha nemese ózge de múlik alǵan tulǵalardyń tizimin jarııalady, dep habarlaıdy QazAqparat tilshisi.
Qujatqa ár túrli baǵytta jumys isteıtin 240 uıymnyń ataýy men azamattardyń esimi engen. Olardyń arasynda kelesiler bar:
- «Daǵdarys ortalyqtary odaǵy» ZTB;
- «Halyqaralyq quqyqtyq bastama» QQ;
- «Ádil sóz» sóz bostandyǵyn qorǵaý halyqaralyq qory;
- Adam quqyqtary jáne zańdylyqty saqtaý jónindegi qazaqstandyq-halyqaralyq bıýro;
- Qazaqstandaǵy «Internews» ókildigi;
- «Saıası sheshimder ortalyǵy» QQ;
- «Shyraq» múmkindigi shekteýli áıelder qaýymdastyǵy QB;
- «Argo» QR azamattyq qoǵamdy damytý qaýymdastyǵy ZTB;
- «QR Kásipodaqtar federatsııasy» RKB;
- «Jasyl qutqarý» ekologııalyq qoǵamy QB;
- «Ulttyq medıatorlar palatasy» respýblıkalyq QB;
- «Qazaqstan zııatkerlik menshik agenttigi» JShS;
- «Bilim-Ortalyq Azııa» bilim berý ortalyǵy» QQ
- «URBAN FORUM KAZAKHSTAN» QQ;
- E.Tátishev atyndaǵy «Erjan» qory jáne taǵy da basqalar.
Sonymen qatar sheteldik kózderden qarjy alatyn tulǵalardyń tizimine Aınur Koskına, Dınara Egeýbaeva, Dmıtrıı Dýbovıtskıı sııaqty tanymal jýrnalıster kirgen. Tolyq tizimdi myna jerden kórýge bolady.
Vedomstvodan málim etkendeı, jarııalanǵan derekter qupııa málimet sanalmaıdy.
«2018 jyldan bastap Salyq kodeksine shet memleketterden, sheteldikterden, halyqaralyq jáne sheteldik uıymdardan aqsha nemese ózge de múlik alǵan tulǵalardyń memlekettik kirister organdaryna eseptilik berýi týraly talap engizildi. 2022 jyly Salyq kodeksiniń 29-babyna ózgeris engizildi, oǵan sáıkes Memlekettik kirister komıteti óziniń ınternet-resýrsynda sheteldik kózderden aqsha nemese ózge de múlik alǵan tulǵalardyń tizilimin jarııalaıdy. Bul túzetý azamattardyń memleketke de, úkimettik emes uıymdarǵa da seniminiń deńgeıin arttyrýǵa baǵyttalǵan. Atalǵan normalardy iske asyrý maqsatynda Qarjy mınıstrligi tıisti Qaǵıdalardy bekitti, tizilimde sheteldik kózderden aqsha nemese ózge de múlik alǵan tulǵalardyń ataýy men sáıkestendirý nómiri (BSN/JSN) kórsetiledi. Salyq kodeksiniń 30-babyna sáıkes salyq tóleýshiniń ataýy men sáıkestendirý nómiri salyqtyq qupııa bolyp tabylmaıdy», - dep túsindirme berdi Memlekettik kirister komıtetiniń baspasóz qyzmetinen.
