Elimizdegi munaı-gaz óndiretin kásiporynǵa kúrdeli jóndeý júrgizildi
Elimizdegi munaı-gaz óndiretin birlesken kásiporyn «Teńizshevroıl» JShS óz tarıhyndaǵy eń kúrdeli jóndeý jumystarynyń birin merziminen buryn aıaqtady, dep habarlaıdy QazAqparat kásiporynnyń baspasóz qyzmetine silteme jasap.
Jóndeý jumystary Teńiz KTJ-2 tehnologııalyq qondyrǵylarynyń senimdiligi men qaýipsizdigin qamtamasyz etýge jáne qorshaǵan ortany qorǵaý boıynsha qosymsha jobalardy júzege asyrýǵa baǵyttalǵan.
«Men TShO men merdiger uıymdar arasyndaǵy berik seriktestikke, sondaı-aq TShO komandasynyń osy ózgeristi basqarýdaǵy jáne mańyzdy beleske jetýdegi adaldyǵy úshin alǵysymdy bildirgim keledi. Qazaqstan bıligi tarapynan kórsetilgen qoldaýdy da atap ótkim keledi», - dedi TShO bas dırektory Kevın Laıon.
Kompanııa tarıhynda birinshi ret tehnıkalyq qyzmet kórsetý toby salmaǵy shamamen 100 tonna jáne bıiktigi 37 metr rezervýardy jańa, metallýrgııalyq jańartylǵan kolonnaǵa sátti aýystyrdy. Sonymen qatar óńdelgen gazdy keptirýge arnalǵan úsh molekýlalyq eleýishti aýystyrdy. Bul qondyrǵylardyń barlyǵy Qazaqstan aýmaǵyndaǵy jergilikti kompanııalarda jasalǵan.
«TShO árdaıym qazaqstandyq óndirýshiler men qyzmet kórsetýshilerdi damytýǵa umtylyp, Qazaqstan úshin eleýli paıda ákeledi», - dedi TShO bas dırektorynyń orynbasary Kóńilqosh Súıesinov
Kúrdeli jóndeý jumystary Qazaqstan Respýblıkasynyń (QR) zańnamasyna jáne halyqaralyq munaı-gaz standarttaryna sáıkes júrgizildi.
«Teńizshevroıl» JShS (TShO) – shıki munaı, suıytylǵan gaz, qurǵaq gaz jáne kúkirtti óńdeýmen, óndirýmen jáne satýmen aınalysatyn qazaqstandyq seriktes kompanııa. TShO zamanaýı tehnologııalardy engizip, óz jumysyn álemdik deńgeıdegi qaýipsizdik jáne ekologııalyq standarttarǵa saı júrgizedi.
TShO 1993 jyly sáýirde Qazaqstan Respýblıkasy Úkimeti men «Shevron» korporatsııasy arasyndaǵy shart boıynsha qurylǵan. Seriktester – «Shevron» – 50 %, «QazMunaıGaz» UK» AQ – 20 %, «EksonMobıl Qazaqstan Venchýrs Ink» – 25% jáne Lýkoıl – 5%.
