Pavlodarda saýda úılerine adamnyń bet-álpetin tanıtyn beınekameralar ornatyldy
«Atrıým saýda úıi, SMALL jáne GRENWICH saýda núkteleri jelisimen is-qımyl barysynda tulǵany taný júıelerin neǵurlym tıimdi paıdalaný týraly ýaǵdalastyqtarǵa qol jetkizildi. Bul júıeler izdeýde júrgen qylmyskerlerdi, habar-osharsyz ketken adamdardy, alımentti qasaqana tólemeıtinderdi jáne basqa da kúdikti adamdardy tanýǵa múmkindik beredi», — dedi Pavlodar oblysy PD bastyǵy Vasılıı Sklıar.
Aıta ketý kerek, qoǵamdyq oryndardaǵy urlyqtyń aldyn alý maqsatynda «Polıtsııanyń qazaqstandyq servıstik modeli» pılottyq jobasy aıasynda Pavlodar qalasy men oblys aýmaǵynda qyzmetin júzege asyratyn shaǵyn jáne orta bıznes ókilderimen turaqty negizde jumys júrgizilip jatyr. Bıznes salasynyń ókilderimen, iri saýda úıleriniń, dúkender men oıyn-saýyq mekemeleriniń qaýipsizdik qyzmetteri men kúzet qurylymdarymen tyǵyz yntymaqtastyq ornatyldy. Qoǵamdyq oryndarda polıtseıler urlyq jasaýǵa beıim adamdardyń fotosýretteri bar tizimderdi turaqty negizde ornalastyrady. Qoǵamdyq oryndarda jáne adamdar kóp jınalatyn oryndarda, qoǵamdyq kólikterde dybysty habarlandyrý jasalady.
