Zyrıan qalasynyń polıtseıleri Zýbov kentinde tabylǵan 27 jastaǵy er adamnyń máıitine qatysty kisi óliminiń jaı-japsaryn tekserýde
ÓSKEMEN. 22 sáýir. QazAqparat - Zýbov kentiniń ýchaskelik ınspektory keshki ýaqytta óziniń aýmaǵyn aralap júrip, turǵyn úıdiń aldynan moınynda jaraqaty bar jas adamnyń máıitin taýyp aldy.
Ol buryn birneshe ret sottalǵan 27 jastaǵy er adam bolyp shyqty.
Polıtseıler shuǵyl áreket etip, jumyssyz, buryn sottalmaǵan, kisi óltirýge kúdikti 22 jastaǵy jergilikti turǵynnyń izine shyqty. Ol ýaqytsha oqshaýlaý abaqtysyna qamaldy jáne qazirdiń ózinde moıyndaý jaýaptaryn berýde.
Anyqtalǵandaı, qaıǵyly oqıǵa burynnan tanys eki adamnyń arasyndaǵy araq ishý otyrysy kezinde bastalǵan janjaldan bolǵan. Qylmysker járbirlenýshini shólmektiń synyǵymen moınynan uryp óltirip, múrdeni kógaldyń shetine súırep tastap, iz sýytqan.
Bul fakti boıynsha QR QK 1-bóliminiń 96-babymen is qozǵaldy. Tergeý amaldary júrgizilýde.
