Zyrıan qalasynda tótenshe jaǵdaıdyń «joǵary daıyndyq» rejimi engizildi
ÓSKEMEN. QazAqparat - Shyǵys Qazaqstan oblysynyń Zyrıan qalasyna qarasty Parygıno aýylynyń tusynda Bobrovka ózeni arnasynan tasydy.
Jaqyn mańda ornalasqan eldimekenderdi sý basý qaýpi joq. Jergilikti atqarýshy organ kópirdiń shaıylyp ketýiniń aldyn alý úshin shuǵyl túrde sý aǵysyn burý jumystaryn júrgizdi. Qazir ózenniń arnasynan tasýy toqtatyldy, dep habarlaıdy QazAqparat ShQO Tótenshe jaǵdaılar departamentine silteme jasap.
Qaýipsizdikti qamtamasyz etý maqsatynda Óskemen qalasynan ShQO TJD-nyń arnaıylandyrylǵan jasaq qutqarýshylarynyń toby (20 adam), Buqtyrmadan Shyǵys óńirlik aeromobıldi jedel-qutqarý jasaǵy (5 adam) attandyryldy.
Budan bólek, osy kezde Glýbokıı aýdanynyń Jańa Úlbi kentinde aýyldyń qalǵan aýmaǵyn sýdan qutqarý boıynsha jumystar júrgizilýde. Jergilikti ákimdiktiń kúshimen ınertti materıaldar tógildi.
Eske salaıyq, búgin qutqarýshylar Jańa Úlbi aýylynyń turǵyndaryn evakýatsııalap jatqanyn habarlaǵan bolatynbyz.
