Zyrıan qalasyna jáne ondaǵy 28 kóshege jańa ataý beriledi
ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov Zyrıan aýdanyna jasaǵan issapary barysynda keńestik kezeńnen qalǵan kóshe ataýlaryn ózgertý máselesin kóterdi, dep habarlaıdy QazAqparat tilshisi.
Aımaq basshysy Zyrıan shaharynda kóptegen kóshelerdiń zaman talabyna saı emestigin synǵa aldy.
«Lenın, Kırov, Ordjonıkıdze, Dzerjınskıı degen sekildi ataýlarǵa nelikten jabysyp qaldyq? Naq osy «qaıratkerlerdiń» kesirinen mıllıondaǵan adamdar qyryldy. Biz óskeleń urpaqty dostyqqa, erkindikke baýlýymyz kerek. Endeshe kóshelerdi Dostyq, Táýelsizdik dep ataıyq. Bizge óz zamanymyzdyń qaharmandaryn dáripteý qajet. Mysaly, Saǵadat Nurmaǵambetov osyndaı qurmetke ábden laıyq. Zyrıannyń ózinen qanshama soǵys batyrlary men eńbek ardagerleri shyqty! Adamzatqa esimi ortaq Abaı, Áýezov, Jambyl bar, Lermontov pen Pýshkın bar. Qanshama dańqty jumysshylar men ınjenerlerdiń, muǵalimder men dárigerlerdiń esimderi eskerýsiz qalyp jatyr. Osy baǵytta jumys isteıik», - dedi Danıal Ahmetov.
Jýyrda bul qalanyń 28 kóshesi jańa ataý ıelenedi degen jospar bar. Jergilikti qoǵamdyq keńestiń usynysyna saı, Sovetskaıa kóshesi Táýelsizdik bolyp, Lenın kóshesi Astana bolyp aýyspaqshy.
Sondaı-aq, Lenınogorskaıa kóshesin - Shıeli, Komsomolskaıa kóshesin soǵys batyry Pavel Koltsov kóshesi dep ózgertý usynylǵan.
Kanavnaıa, Proletarskaıa, Voroshılov kósheleri - Bastaý, Sport, Eńbek degen ataý alsa, Sovetskaıa tuıyq kóshesi Kóleńkeli bolyp qaıta atalýy múmkin.
Qazir qala turǵyndarynyń arasynda Zyrıan qalasynyń óz ataýyn aýystyrý máselesi de qyzý talqylanýda. Kenshiler shaharyn Altaı dep ataý usynylyp otyr.
