Zyrıan aýdanynda da tasqyn bastaldy - ShQO
ÓSKEMEN. QazAqparat - Shyǵys Qazaqstan oblysyndaǵy Zyrıan aýdanynyń Zýbov kentinde tasqyn saldarynan adamdar kóshirile bastady, dep habarlaıdy QazAqparat tilshisi.
Oblystyq tótenshe jaǵdaılar departamenti taratqan málimette Buqtyrma ózeni arnasynan asyp, atalmysh kenttiń birneshe kóshesine sý jaıylǵany aıtylǵan. Qazir Toqtarov, Beregovaıa, Lazo jáne Kazachenko kóshelerinen úıin sý basqan adamdar qaýipsiz jerge kóshirilýde.
Eldi mekenniń kóshelerine kezekshiler qoıylyp, qutqarý jumysyna kómek retinde Serebrıansk qalasynan 10 órt sóndirýshi kelip jetti.
«Úıin tastap shyqqandar sany áli anyqtalǵan joq. Qutqarý jumystary qarqyndy júrip jatyr. Tasqynnan zardap shekken turǵyndar mektep bazasynda qurylǵan ýaqytsha baspanaǵa ornalasýda. Sý basqan aýmaqta jergilikti polıtsııanyń 2 ekıpajy men ákimdik ókilderi júr. Aýdandyq ákimdik júrgizgen esep boıynsha qazirdiń ózinde 27 úıge sý kirgen. Onyń tórteýi bos turǵan úıler. Sý alǵan úılerdi esepke alý jumystary da jalǵasýda», delingen resmı málimette.
Aıta keteıik, atalmysh aýdanda tasqynnyń taǵy bir tolqyny bolatynyn buǵan deıin ІІM vıtse-mınıstri eskertken bolatyn.
