«Zyń-zyń» ániniń avtory týberkýlezden kóz jumdy - dáriger
ShYMKENT. QazAqparat - Shymkenttik dárigerler «Zyń-zyń» ániniń avtory Bolat Nurymovty ókpe qurt aýrýynan qaıtys bolǵanyn rastady. Bul týraly oblystyq týberkýlez dıspanseriniń bas dárigeri Bolat Saǵymbekov aıtty, dep habarlaıdy QazAqparat tilshisi.
Bolat Saǵymbekovtyń sózinshe, Bolat Nurymov osy jyldyń maýsym aıynan beri naýqastanyp júrgen. Keıinnen Almatydaǵy jeke klınıkaǵa qaralǵan. Sol kezde týberkýlez aýrýyna shaldyqqan degen kúdik bolypty.
«Jeke klınıkadaǵy dárigerler ony Shymkentke jibergen. Biraq ol Shymkentke kelgenimen dárigerlerge barmaǵan. Keıin Tashkentke baryp, sol jaqta qaralǵan. Ondaǵylar tıisti dárileri men emdelý joldaryn jazyp bergen. Biraq jaǵdaıy jaqsarmaǵan. Dárigerlerdiń jazyp bergenine qaraǵanda týberkýlezge shaldyqqanyn rastamaǵan. Sóıtip júrgende salmaq tastap, jaǵdaıy nasharlap ketken ǵoı. Sodan mazasy qashqan soń ol Shymkenttegi «Daýmed» klınıkasyna qaralǵan. Ondaǵy dárigerler rentgenge túsirip, ony kópsalaly aýrýhanaǵa jibergen. Atalǵan aýrýhanaǵa ánshi óte aýyr jaǵdaıda túsken. Ondaǵy dárigerleri kóredi da, tıisti synamalar alǵan kezde týberkýlezdiń óte aýyr túri ekenin anyqtalǵan. Eger osy dıagnozdy maýsym aıynda qoıyp, tıisti em qabyldaǵanda ol jazylyp ketýshi edi. Bizdiń dıspanserge naýqas 23-i kúni keshki saǵat 8-de túsken. Bir táýlikten keıin, 24-i kúni keshki saǵat onda qaıtys boldy», - deıdi Bolat Saǵymbekov.
Dárigerdiń aıtýynsha, qazir marqumnyń áıeli men balasy da mekenjaıy boıynsha emhanada tekseriletin bolady. Olardy aq halattylar bir jylǵa deıin baqylaýǵa almaq.
