Zymyrannyń ushyrylymyna daıyndalǵan «Baıqońyrdan» tikeleı efır júrýde

BAIQOŃYR. QazAqparat - «Amazonas-5» telekommýnıkatsııalyq ǵarysh apparaty bar «Proton-M» («Brız-M» údetkish blogymen) zymyran tasyǵyshynyń «Baıqońyr» aılaǵynan ushyrylymy Astana ýaqytymen 01 saǵat 23 mınýt 41 sekýndqa belgilendi, dep habarlaıdy QazAqparat tilshisi.

Saǵat 23.15-te Roskosmos saıtynda zymyran ornatylǵan № 200 alańnan onlaın-translıatsııa júrgizile bastady .

Vıdeodan «Proton» keshenin kórýge bolady, ara-tura efırge ushyrylymǵa ázirlik jónindegi komandalar berilip turady. 

«Amazonas-5» telekommýnıkatsııalyq spýtnıgin Hispasat (Ispanııa) tapsyrysy boıynsha Space Systems/Loral (AQSh) kompanııasy jasady. Ǵarysh apparaty Ortalyq jáne Ońtústik Amerıka aýmaǵynda televıdenıe, korporatıvti jeliler jáne telefon baılanysy salalarynda qyzmet kórsetýge arnalǵan.

Aýyr sanattaǵy «Proton-M» zymyran-tasyǵyshynyń jáne «Brız-M» údetkish blogynyń paıdalanylýymen ıspandyq spýtnıkti ushyrý kelisimshartyn «Proton» zymyran tasyǵyshyna eksklıýzıvti quqyqqa ıe amerıkalyq International Launch Services Inc. (ILS, Reston) kompanııasy jasaǵan.

ILS - M.V.Hrýnıchev atyndaǵy «Memlekettik ǵaryshtyq ǵylymı-óndiristik ortalyǵynyń» enshiles kásiporny.