Zýra Jumanova: Aýyryp kelgen adamǵa qoldaý kórsetý - boryshym
ALMATY. QazAqparat - Adamdy dárimen emes, birinshi kezekte sózben emdeý kerek. Gıppokrattyń osy ustanymyn ómirlik qyzmetinde tý etip ustap kele jatqan mamandyq ıeleriniń biri - medbıkeler. Qazaqstan medıtsınalyq qyzmetkerleriniń kásibı merekesine oraı Almatyda 42 jyl ǵumyryn medıtsınaǵa arnaǵan tájirıbeli medbıke Zýra Jumanovamen tildestik.
Qadirli ana, abyroıly qyzmetker Zýra Jumanova qazirdiń ózinde №20 memlekettik emhanasynyń juqpaly aýrýlar kabınetinde medbıke qyzmetin atqaryp keledi.
«Eńbek jolymdy 1977 jyly Qostanaı oblysy Jitiqara qalasynyń perzenthanasynda medbıke bolyp bastadym. 1978 jyldan bastap 1995 jylǵa deıin Almaty qalalyq №3 balalar emhanasynda medbıke bolyp jumys istedim. 1995 jyldan bastap 2011 jylǵa deıin juqpaly aýrýlar aýrýhanasynda aǵa medbıke bolyp qyzmet ettim. 2011 jyldan beri Túrksib aýdanyndaǵy №20 emhananyń juqpaly aýrýlar kabınetinde medbıke bolyp jumys istep kelem», - dedi Zýra Jumanova.
Bilikti mamannyń bir kúngi jumysy indetke qarsy profılaktıkalyq sharalardan bastalady. Odan keıin kelýshi patsıentterdiń muń-muqtajyn tyńdap, taldaýǵa jiberip, tekserýge baǵyttaıdy.
«Men úshin eń basty baqyt - patsıentterimniń qajetti aqparatty alyp, kórsetilgen qyzmetke kóńili tolǵany. Birneshe jyldan beri jumys istep kele jatqanyma baılanysty patsıentter meni keıde dárigermen teń kóredi. Aqyl suraıdy. «Dáriger adamdy birinshi dárimen emes, sózben emdeıdi» degen sózdiń jany bar. Biz qobaljyp kelgen adamdarǵa basý aıtyp, olardy sabasyna túsirýge tyrysamyz. Keıde artyq áreket etpeýin ótinip, merziminen buryn kóńil túsirmeýge keńes beremin», - dedi Zýra Jumanova.
Ómir jolynda kópti kórgen maman jas medbıkelerge óz aqyl-keńesin aıtty.
«Jas medbıkelerge tańdaý jasaǵan mamandyǵyna adal bolýyn tileımin. Adamdarǵa meıirimdi, qaıyrymdy bolýǵa shaqyramyn», - dedi ol.
Zýra Jumanova - otbasynda eki qyz, eki nemere tárbıelep otyrǵan baqytty otanasy.
«Qyzdarym jolymdy qýǵan joq. Biraq jaqyn týystarymnyń kópshiligi medıtsına salasynda», - dedi Zýra Jumanova.
