Zýmerlerge dos tabý jáne qarym-qatynas qurý qıyndap barady — Máýlen Áshimbaev
ASTANA. KAZINFORM — Senat Tóraǵasy Máýlen Áshimbaev jastardyń kópshilikpen aralasýǵa jáne ortaǵa beıimdelýge qınalatynyn aıtyp, olarǵa psıhologııalyq qoldaýdy kúsheıtý qajettigin málimdedi.
Bul jóninde Senat spıkeri palata depýtattary maquldaǵan «Psıhologııalyq qyzmet týraly» Zańdy qarastyrý kezinde pikir bildirdi.
Onyń sózinshe, Z urpaqtyń ókilderi áleýmettik jeli, ǵalamtor, jasandy ıntellekt, zamanaýı ómirdiń tym jyldam qarqyny áserinen birqatar psıhologııalyq qıyndyqqa ushyrap otyr.
— Árıne, jastardyń bárinde mundaı másele bar dep aıta almaımyz, biraq atalǵan túıtkil ýaqyt ótken saıyn ózekti bola túsýde, — dedi Máýlen Áshimbaev.
Onyń málimdeýinshe, jastardyń keı bóligi kópshilikpen aralasý, ortaǵa beıimdelý, ózgelermen baılanys ornatýda qıyndyqqa tap bolyp otyr. Olardyń kóbi mundaı máselesi jóninde ashyq aıtýǵa batpaıdy. Al ata-analary kóp jaǵdaıda shettetý men qoǵamnyń talqysynan qaýiptenip, psıhologtarǵa júginýden qashady.
Senat Tóraǵasy qazirgi jastar eldiń bolashaǵy ekenin jáne keleshekte memleketti damytyp, mańyzdy sheshimder qabyldaıtynyn atap ótti.
— Sondyqtan qazirgi jaǵdaıda psıhologııalyq turaqtylyq aıryqsha mańyzdy, — dedi ol.
Máýlen Áshimbaev atalǵan túıtkildi ashyq talqylap, psıhologııalyq qıyndyqqa ushyraǵan jastardy qoldaýdyń tıimdi júıesin qurýǵa shaqyrdy.
Otyrys qorytyndysy boıynsha, Senat «Psıhologııalyq qyzmet týraly» Zańdy maquldady. Qujat qol qoıýy úshin Qazaqstan Prezıdentine jiberildi.
Aıta keteıik, buǵan deıin elde psıhologııalyq qyzmetke qoıylatyn talaptar aıqyndalǵanyn jazǵanbyz.
