Zulmat jyldardyń áli de ashylmaǵan aqtańdaqtary kóp – tarıhshy Saǵynǵalı Ábýbákirov

ShYMKENT. QazAqparat – Shymkenttik tarıhshy Saǵynǵalı Ábýbákirov zulmat jyldarǵa qatysty arnaıy memlekettik komıssııa qurylatyny der kezinde qabyldanǵan sheshim ekenin aıtady. Onyń pikirinshe, tarıhı ádildikti qalpyna keltirý jumystaryn aıaqtaý men saıası qýǵyn-súrkin qurbandaryn aqtaý boıynsha kóp zertteý jumystaryn júrgizý qajet, dep habarlaıdy QazAqparat tilshisi.

Tarıhshy-ǵalym óz kezeginde repressııaǵa ushyraǵan ult ardaqtylaryn búgingi urpaq esten shyǵarmas úshin ár óńirde arystaı azamattar jaıynda jınaq kitaptar shyǵarsa dep otyr.

«Ár aımaqtaǵy eldi mekenderge, kóshelerge nemese sol jerdegi mektepterge de eńbegi sińgen azamattardyń atyn berse, atyn berip qana qoımaı jastarǵa erligin, órligin nasıhattaý jaǵyn da qalys qaldyrmasa degen oıymdy jetkizgim keledi. Sondaı-aq, elimizdegi muraǵattarda jatqan materıaldardy qoljetimdi etýge qolǵabys etse deımin. Sebebi, oǵan tarıhshylardyń qoly jete bermeıdi. Mine, memlekettik deńgeıde osyǵan ruqsat beretin kez keldi. Memlekettik komıssııa osyǵan nazar aýdarsa deımin. Óıtkeni, zulmat jyldarǵa qatysty áli de ashylmaǵan aqtańdaqtar kóp»,- deıdi tarıh ǵylymdarynyń kandıdaty, professor.