Zulfýhar Joldasov atmosfera aýasynyń lastanýy joǵary qalalardy atady
«Búgingi tańda kópshilikti atmosfera aýasy men stıhııalyq qoqystar máselesi alańdatady. Osy problemalardy sheshý úshin mınıstrlik birqatar júıeli is-shara qabyldaýda. Birinshiden, eldegi ekologııalyq jaǵdaıdy jaqsartý úshin óńirlerdegi ekologııalyq problemalardy keshendi sheshý jónindegi Jol kartalary iske asyryldy. Ekinshiden, atmosferalyq aýanyń sapasyn qamtamasyz etý boıynsha «Jasyl Qazaqstan» ulttyq jobasynyń is-sharalary júzege asyrylýda. Úshinshiden, ónerkásiptik kásiporyndardyń qyzmetin ekologııalyq retteý jáne baqylaý júrgizilýde. Anyqtamalyqtar ázirlenýde jáne óndiristik obektilerde eń ozyq qoljetimdi tehnologııalar engizilýde. Parnıktik gazdar shyǵaryndylaryn azaıtý jónindegi jol kartasy ázirlendi. Tarıhı lastanýlardy joıý júrgizilýde. Ekologııalyq shıelenis oshaqtarynyń kartasy ázirlendi. Ekologııalyq zańnamany jetildirý júzege asyrylady», - dedi ol Ortalyq kommýnıkatsııalar qyzmetindegi baspasóz máslıhaty barysynda.
Onyń atap ótýinshe, atmosfera aýasynyń lastanýy búgingi kúnniń ózekti máseleleriniń biri bolyp otyr.
«Temirtaý, Nur-Sultan, Almaty, Aktóbe, Atyraý, Óskemen, Qaraǵandy, Balqash, Jezqazǵan, Shymkent qalalarynda atmosfera aýasynyń joǵary lastanýy oryn alǵan. Onyń birneshe sebebin aıtýǵa bolady: Almaty jáne Nur-Sultanda – jylý kózderi, avtokólik jáne jeke sektor. Óskemen jáne Temirtaý qalalarynda - ónerkásip. Aqtobe jáne Atyraý qalalarynda – eskirgen káriz tazartý qurylǵylary. Ekologııalyq problemalardy onyń ishinde atmosfera aýasynyń sapasyn jaqsartý maqsatynda mınıstrlik aýmaqtyq ákimdiktermen birigip ekologııalyq problemalardy keshendi sheshý boıynsha jol kartalaryn bekitti. 2021 jyly barlyǵy 36 is-shara iske asyryldy», - dedi Z.Joldasov.
