Zúlfııa Súleımenova Jambyl oblysyndaǵy magıstraldyq kanaldar problemasyn aıtty
«Jambyl oblysy boıynsha aıtsaq, qazirgi kezde muzdyqtardyń álsiz erýi saldarynan Qyrǵyzstan aýmaǵyndaǵy sý qoımalarynyń az tolýyna baılanysty kúrdeli jaǵdaı baıqalyp otyr. 2023 jylǵy vegetatsııalyq kezeńge arnalǵan Qyrǵyzgıdromettiń aldyn ala boljamyna sáıkes, Shý jáne Talas ózenderiniń sý deńgeıi normadan 100 paıyzdan 120 paıyzǵa deıin boljanǵan. Degenmen, kelip jatqan sýdyń jáne sý qoımalarynyń tolyqtyǵyna jasalǵan monıtorıng boljamnyń rastalmaǵanyn kórsetti. Qyrǵyzstan Sý resýrstary qyzmetiniń málimetinshe, bul ózenderdegi sý deńgeıi normadan eki ese tómen bolyp shyqty», - dedi Z. Súleımenova.
Onyń aıtýynsha, sýdy tıimdi paıdalaný jáne egindi saqtaý maqsatynda Jambyl oblysynyń ákimdigine sý berý kezinde basymdyqty aıqyndaý (daqyldar boıynsha), sý aınalymyn jáne sýarý kezektiligin (túngi sýarý) qatań saqtaý usynyldy.
«Sonymen qatar Jambyl oblysynda óńirdiń sýmen qamtamasyz etilýine teris áser etetin birqatar problema anyqtaldy. Máselen, búginde paıdalanylatyn sýarmaly jerler týraly naqty málimet joq ekeni belgili boldy. Ákimdiktiń málimeti boıynsha 181 myń ga sýarmaly jer bar. Al osy jyly jasalǵan sharttar boıynsha Qazsýshar tek 93,6 myń ga jerge ǵana sý beredi. Qalǵandarynda kelisimder joq. Jekelegen sharýa qojalyqtary alqaptarǵa egin egip, «Qazsýshar» RMK-men sý berý týraly shart bekitpegen, bul jalpy sýmen qamtamasyz etý boıynsha jaǵdaıǵa áser etedi», - dedi mınıstr.
Onyń sózine qaraǵanda, magıstraldyq kanaldarǵa sorǵylardy zańsyz qosý faktileri bar. Mysaly, Tasótkel magıstraldyq kanaly boıynsha 200-den astam osyndaı sorǵy anyqtaldy. Osyndaı sý paıdalanýshylarmen sharttar jasasý jáne sý burýdy esepke alý boıynsha jumystar eskerilgen.
«Qalyptasqan jaǵdaıdy eskere otyryp, daqyldarǵa sý berýdiń basymdylyǵyn anyqtap, sý aınalymy men sýarý retin qatań saqtaý qajet», - dedi vedomstvo basshysy.
