Zúlfııa Súleımenova men Kanada Elshisi Alan Hemson «jasyl» ekonomıka salasyndaǵy ózara yntymaqtastyǵy máselelerin talqylady

ASTANA. QazAqparat - Búgin Qazaqstannyń Ekologııa jáne tabıǵı resýrstar mınıstri Zúlfııa Súleımenova men Kanadanyń QR Elshisi Alan Hemson myrza eki eldiń ekologııa, klımattyń ózgerýi jáne «jasyl» ekonomıka salasyndaǵy ózara yntymaqtastyǵy máselelerin talqylady, dep habarlady QR Ekologııa jáne tabıǵı resýrstar mınıstrliginiń baspasóz qyzmeti.

Atap aıtqanda, Mınıstr klımattyń ózgerýiniń zamanaýı syn-qaterleri men parnıktik gazdar shyǵaryndylaryn azaıtý qajettiligi elderge kómirtegi beıtaraptyǵyna qol jetkizý mindetin qoıyp otyrǵanyn atap ótti. Búgingi tańda klımattyń ózgerýi Qazaqstan úshin basym baǵyt bolyp tabylady. Qazaqstannyń 2060 jylǵa deıingi kómirtegi beıtaraptyǵyna qol jetkizý strategııasy bekitildi, oǵan sáıkes 2030 jylǵa deıingi kezeńde parnıktik gazdar shyǵaryndylaryn 15%-ǵa qysqartý josparlanýda.

Sondaı-aq, bizdiń el Klımattyq táýekelderge ushyraýdy azaıtý úshin tabıǵı sheshimderdi qoldanýǵa erekshe nazar aýdaratyny aıtyldy. Ormandar men ózge de ekojúıelerdiń sińirgish qabiletin eskere otyryp, sondaı-aq shóleıttený problemalarymen kúresý maqsatynda 2025 jylǵa deıin respýblıkada 500 myń gektar alqapqa 2 mlrd. aǵash otyrǵyzylatyn bolady.

Aıta ketý kerek, Kanada álemdegi eń iri orman derjavalarynyń biri bolyp tabylady jáne olardyń tabıǵı resýrstardy saqtaý, klımattyń ózgerýimen, sondaı-aq orman órtterimen kúresý strategııasynyń mańyzdy bóligi bolyp tabylatyn orman ósirý jáne turaqty orman sharýashylyǵy salasyndaǵy tájirıbesi Qazaqstanda qoldanylýy múmkin.

Taraptar sý resýrstary men «jasyl» ekonomıka máselelerin de talqylady.

Sonymen qatar, Qazaqstan Kanada tájirıbesine súıene otyryp, sý men aǵyndy sýlar sapasynyń halyqaralyq standarttaryn engizý jáne kommýnaldyq sektorda da, ónerkásipte de tıisti ozyq tájirıbe nátıjesinde eleýli paıda ala alady.

«Biz osy saladaǵy ozyq tájirıbelerdi qoldanýda yntymaqtastyqqa daıynbyz», - dedi Z.Súleımenova.