Zorlyqtyń eshbir túrin qoldamaımyz – Túrkııa elshiligi búldirshindi tebý oqıǵasy týraly ún qatty

ASTANA. QazAqparat – Túrkııa Respýblıkasynyń Qazaqstandaǵy elshiligi Almaty oblysynda túrkııalyq búldirshindi tepken keleńsiz jaǵdaıǵa qatysty pikir bildirdi, dep habarlaıdy QazAqparat.

«Almatyda kishkentaı balaǵa qatysty bolǵan kúsh kórsetý oqıǵasyn ókinishpen estidik. Zorlyq-zombylyqtyń eshbir túrin, qalaı jáne kim jasaǵanyna qaramastan qabyldamaıtynymyzdy jetkize otyryp, kishkentaı balaqaı men onyń otbasyna tez saýyǵyp ketýin tileımiz», - dep jazdy Túrkııa elshiligi áleýmettik jelide.

Aıta keteıik, Almaty oblysynyń Qarasaı aýdanyndaǵy saýda ortalyǵynda 4 jasar qyz balany er adam teýip ushyrǵan. Jedel-izdestirý is-sharasy barysynda tártip saqshylary 1998 jylǵy Túrkııa Respýblıkasynyń azamatyn anyqtap, polıtsııaǵa jetkizdi. Kúdikti jaýap alý barysynda oqıǵany baıandap, óz kinásin tolyq moıyndady.

Bala quqyqtary jónindegi ýákil Dınara Zákıeva kúdiktiniń ustalǵanyn, «Buzaqylyq» baby boıynsha is qozǵalǵanyn aıtty. Jazasyn munda ótegennen keıin sheteldik el aýmaǵynan shyǵarylady.