Zorlyq-zombylyqtan, sýıtsıdten saqtaý – balalarǵa qatysty keshendi jospar bekitilmek

ASTANA. QazAqparat – Balalardy zorlyq-zombylyqtan qorǵaý, sýıtsıdtiń aldyn alý, olardyń quqyǵy men salamattyǵyn qamtamasyz etý jónindegi 2023-2025 jyldarǵa arnalǵan keshendi jospar bekitilmek. Oqý-aǵartý mınıstrligi ázirlegen tıisti qujat «Ashyq» NQA portalynda jarııalandy, dep habarlaıdy QazAqparat tilshisi.

«Qaýly jobasynyń maqsaty – balalardyń qaýipsizdigin qamtamasyz etý, olarǵa bilikti kómek kórsetý jáne zorlyq-zombylyqtyń aldyn alýǵa baǵyttalǵan qosymsha sharalar keshenin qabyldaý», - delingen qujatta.

Sonymen qatar keshendi josparda birneshe jaýapty mınıstrlikpen jáne jergilikti atqarýshy organdarmen yntymaqtasa atqarylatyn sharalar kórsetilgen. Atap aıtqanda, kámeletke tolmaǵandardyń ınternet jelisindegi derbes derekterin qorǵaý, qumar oıyn, sıntetıkalyq esirtki, ishimdik jáne ózge de psıhotroptyq zattardy qoldanýynyń aldyn alý jumystary qolǵa alynbaq. Buǵan qosa, erte júktilik pen túsik jasaýdyń saldarymen emes, sebebimen kúresý joldary qarastyrylmaq.

Oqý-aǵartý mınıstrliginiń dereginshe, keshendi jospardy oryndaý sheńberinde kútiletin nátıjeler:

- balalarǵa qatysty jasalatyn jynystyq qolsuǵýshylyqqa qarsy qylmystar sanyn jyl saıyn 2% tómendetý;

- kámeletke tolmaǵandar arasyndaǵy sýıtsıd pen oǵan ıtermeleıtin áreketter sanyn jyl saıyn 1,5% tómendetý;

- qosymsha bilim berýmen qamtylǵan balalar sanynyń jyl saıyn 5% arttyrý;

- tótenshe jaǵdaılar, jol-kólik oqıǵalary jáne basqa da jazataıym oqıǵalar saldarynan balalardyń ólimi men jaraqattaný sanyn azaıtý:

- balalardyń quqyqtaryn qorǵaý salasyndaǵy memlekettik organdardyń vedomstvoaralyq ózara is-qımylynyń tıimdiligin arttyrý.

Qujat 21 aqpanǵa deıin kópshilik talqylaýda bolady.