Zorlyq jasaǵan jolserikterge úkim shyǵarǵan sot ókili de jaýapqa tartylýy múmkin – Májilis depýtaty
NUR-SULTAN. QazAqparat – QR Parlamenti Májilisiniń depýtaty Nurjan Áltaev «Talgo» poıyzynda zorlyq jasaǵan jolserikterge úkim shyǵarǵan sýdıalarǵa qatysty óz ustanymyn bildirdi, dep habarlaıdy QazAqparat tilshisi.
«Atalmysh sot ókiline qatysty qyzmettik tekserý júrgizý boıynsha talap qoıatyn bolamyz. Biraq naqty tekserý bolady dep aıta almaımyn. Sot bizdiń memlekette bıliktiń táýelsiz tarmaǵy bolyp sanalady. Ol Parlamentten de, Úkimetten de táýelsiz. Sonda da biz olardan qyzmettik tekserý júrgizýdi talap etetin bolamyz. Halyqtyń ókili retinde depýtattyq suraý salýǵa haqymyz bar. Qazir meniń atymnan Bas Prokýratýra men Joǵarǵy sotqa, «Qazaqstan temir joly» ulttyq kompanııasynyń basqarma tóraǵasynyń atyna jazylǵan úsh hat jatyr», - dedi depýtat.
Eske salsaq, ǵylymı konferentsııadan qaıtyp kele jatqan boıjetkendi «Talgo» poıyzynda zorlady degen kúdik boıynsha eki jolserikke qatysty qylmystyq is sotqa túsken. Keıin bul oqıǵa boıynsha «Jolaýshylar tasymaly» AQ túsinik berdi. 26 shilde kúni Qostanaıda «Tulpar-Talgo» poıyzynda aqtóbelik boıjetkendi zorlaǵan eki jolserikke úkim oqyldy.
