Zorlyq kórgen jolaýshy «QTJ» kompanııasynan qaýipsizdikti qamtamasyz etýdi surady
«Talgo» poıyzynda zorlyq kórgen jábirlenýshi basynan ótken oqıǵany dóńgelek ústelge qatysýshylarǵa tolyq baıandaı kelip, áýelde kináli tarap isti aqsha tóleý arqyly jaýyp tastamaq bolǵanyn aıtty.
«Іstiń basqalaı baǵyt alyp bara jatqanyn kórgende maǵan zorlyq kórsetken tarap aqsha usyndy. Men aqshaǵa muqtaj adam emes ekenimdi, ar-namysym úshin kúresip júrgenimdi aıttym. Olar usynǵan aqshany men eki aıda taba alamyn. Eki aıda tabatyn aqshany biz saǵan bir jolda bergeli otyrmyz dep kóndirmek boldy», - deıdi jábirlenýshi.
Ol sondaı-aq bul isti eshqandaı yń-shyńsyz, zań aıasyda sheshpek bolǵanyn aıtady. Alaıda óz quqyǵy men namysy qorǵalyp jatpaǵanyn kórgende ǵana qoǵamdyq uıymdarǵa júgingen.
«Men eń birinshi egde jastaǵy ata-anamdy oıladym. Solarǵa aýyr tıetinin bildim. Sol úshin eshqandaı rezonans týǵyzbaı-aq, zań aıasynda sheshkim keldi. Biraq olaı múmkin bolmady», - degen zardap shegýshi «Qazaqstan temir joly» kompanııasynyń ókilderinen jolaýshylardyń qaýipsizdigin qamtamasyz etýdi surady.
«Qazaqstan temir joly» kompanııasynan jolaýshylardyń qaýipsizdigin tolyq kólemde qamtamasyz etýdi suraımyn. Vagondarǵa belgi beretin tetik ornata ma, álde beınebaqylaý qoıa ma, áıteýir qaýipsizdikti qamtamasyz etý qajet. Eger sol kezde osyndaı tetikter bolsa, men osylaısha azap shekpes edim», - dedi ol.
Eske salsaq, ǵylymı konferentsııadan qaıtyp kele jatqan boıjetkendi «Talgo» poıyzynda zorlady degen kúdik boıynsha eki jolserikke qatysty qylmystyq is sotqa túsken. Keıin bul oqıǵa boıynsha «Jolaýshylar tasymaly» AQ túsinik berdi. 26 shilde kúni Qostanaıda «Tulpar-Talgo» poıyzynda aqtóbelik boıjetkendi zorlaǵan eki jolserikke úkim oqyldy.
