Zorlyq-zombylyq kórgen áıelderdiń 30 paıyzy kúıeýlerine qaıtyp oralady

ALMATY. KAZINFORM – Byltyr Almatydaǵy «Jan-Saıa» daǵdarys ortalyǵyna 2 myńǵa jýyq áıel men bala júgingen. Bul týraly óńirlik kommýnıkatsııalar qyzmetiniń alańynda ortalyq ókilderi aıtty.

Spıkerlerdiń aıtýynsha, byltyr ortalyqta turmystyq zorlyq-zombylyqqa ushyraǵan 1980 áıel men bala qoldaý tapty, 2022 jyly 1708 adamǵa kómek kórsetildi.

«Turmystyq zorlyq-zombylyqtan zardap shekken áıelderdiń 30 paıyzy kúıeýlerin keshirip, úılerine oralady. Ókinishke qaraı, sol kelinshekterdiń teń jartysy daǵdarys ortalyǵyna qaıtyp keledi. Óıtkeni, joldasy judyryq ala júgirýin toqtatpaǵan. Sondyqtan depýtattar Qazaqstanda turmystyq-zorlyq zombylyq úshin jazalaýdy qatańdatatyn zań jobasyn maquldaýyn suraımyz. Búgingi kúni bul qajet jáne ózekti», - deıdi «Daǵdarys ortalyqtary odaǵy» zańdy tulǵalar birlestiginiń tóraǵasy Zýlfııa Baısaqova.

«Jan-Saıa» daǵdarys ortalyǵynyń zańgeri Gúlshara Saparova atap ótkendeı, daǵdarys ortalyǵynyń maqsaty – áıelder men balalardy genderlik zorlyq-zombylyqtyń kez kelgen túrinen qorǵaý.

«Munda zardap shekkenderge baspana, quqyqtyq, psıhologııalyq jáne áleýmettik qoldaý kórsetiledi. Ortalyq sonymen qatar balalarǵa arnalǵan túrli is-sharalar ótkizedi jáne «150» senim telefony bar. Sondaı-aq 8 771 450 3 450 uıaly telefonyna qońyraý shalýǵa nemese qaýip tóngen jaǵdaıda WhatsApp qosymshasyna jazýǵa bolady»,- deıdi Gúlshara Saparova.

Zańger belgili faktiler ishki ister organdarynda tirkelip, qadaǵalaý mekemesi baqylaý júrgizetinin atap ótti.