Zorlaý faktisin joqqa shyǵarǵan Bilim vıtse-mınıstri: Bul aldyn ala málimet bolatyn
ASTANA. QazAqparat - QR Bilim jáne ǵylym vıtse-mınısti Bıbigúl Asylova Ońtústik Qazaqstan oblysynda mektep oqýshysyn zorlaý faktisiniń joqqa shyǵarylýyna qatysty pikir bildirdi, dep habarlaıdy QazAqparat tilshisi.
«Aıtarym, oqıǵa jaıly habar alǵan kezden bastap Balalardyń quqyqtaryn qorǵaý komıteti osy aqparatty tekserip, jergilikti bilim departamentimen udaıy baılanysyp otyr. Seısenbi, 13 naýryz kúni aıtylǵan derekter aldyn ala málimetter edi jáne olar óńirlik bilim departamentiniń qolyndaǵy aqparatqa negizdelgen bolatyn. Qazirgi kezde komıtet ókilderi de OQO-ǵa attandy», - dedi búgin ol Úkimet úıindegi is-sharadan keıin tilshiler suraǵyna bergen jaýabynda.
Sondaı-aq ol osyndaı jaǵdaılardy muqııat baqylap otyrǵany úshin jurtshylyq pen QR Bala quqyqtary jónindegi ýákili Zaǵıpa Balıevaǵa alǵysyn bildirdi.
«Jalpy, biz, negizinen, osyndaı jaıttarǵa jurtshylyqtyń beı-jaı qaramaǵanyn qalaımyz. Menińshe, qazir qandaı da bir qorytyndy jasaý erte. Óıtkeni tıisti resmı qorytyndylar jasalatyn bolady. Sodan keıin múddeli organdarmen birge osy másele jóninde resmı ustanymymyzdy jarııalaımyz», - dedi Asylova.
13 naýryzda bilim jáne ǵylym vıtse-mınıstri Bıbigúl Asylova OQO-da 7 jasar balany zorlaý faktisin joqqa shyǵarǵan bolatyn.
Eske salaıyq, OQO-nyń Abaı aýylynda birinshi synyp oqýshysyn uryp-soǵý jáne zorlaý faktisi boıynsha qylmystyq is qozǵalǵan bolatyn.
Búgin atalmysh oqıǵa boıynsha qyzmettik mindetterin durys atqarmaǵany úshin birqatar tulǵalar sógis aldy, jumystarynan shettetilip, bosatyldy.
