Zorlanǵan qyz 10-qabattan sekirgen: Pavlodardyń úsh turǵynyna úkim shyqty

PAVLODAR. QazAqparat – Pavlodar oblysynda qyzdy birneshe adam bolyp zorlaý qylmysyna qatysty sot úkimi shyqty, dep habarlaıdy QazAqparat Pavlodarnews.kz saıtyna silteme jasap.

Atalǵan is oblystyq qylmystyq ister jónindegi mamandandyrylǵan aýdanaralyq sotynda jabyq jaǵdaıda qaraldy.

Pavlodar oblysynyń 19, 22 jáne 24 jastaǵy úsh turǵynyna 16 jastaǵy qyzdy zorlady degen aıyp taǵyldy. Barlyǵy da Ertis aýdanynyń týmasy.

Sot sheshimimen 19 jastaǵy aıyptalýshy qyzdy zorlaǵany úshin 15 jyl 6 aıǵa bas bostandyǵynan aıyryldy. Ol ómir boıyna pedagogıkalyq qyzmetpen aınalysa almaıdy jáne kámeletke tolmaǵandarmen jumys isteýge quqy joq. Sondaı-aq sottalýshydan jábirlenýshige moraldyq zııannyń ótemaqysy retinde 8 mıllıon teńge óndirilip alynady.

Qalǵan eki aıyptalýshy QR Qylmystyq kodeksiniń 434-baby (Qylmys týraly habarlamaý) boıynsha kináli dep tanyldy. Olar tórt jylǵa bas bostandyǵynan aıyryldy. Jazalaryn qaýipsizdigi ortasha qylmystyq-atqarý júıesi mekemesinde óteıdi. Úkim kúshine engenge deıin «qamaýda ustaý» túrindegi bultartpaý sharasy ózgerissiz qaldy.

«S. jáne K.-ǵa qatysty balama jaza taǵaıyndaý jáne bultartpaý sharalaryn qarastyra otyryp, sot olardyń túzelýi qoǵamnan oqshaýlanǵan jaǵdaıda ǵana múmkin dep sheshti. Qyz sekirip ketti. Sizder eshteńe bolmaǵandaı qylmys ornynan qashyp kettińizder. Kináni ishinara moıyndasańyz da, jedel járdem shaqyrǵan joqsyz. Kómek bolǵan joq. Barlyq is-áreketterińiz osyndaı jazaǵa ákep soqtyrdy», – dedi oblystyq qylmystyq ister jónindegi mamandandyrylǵan aýdanaralyq sotynyń tóreshisi Baqyt Nurlanov.

Úkim zańdy kúshine engen joq.

Eske sala keteıik, byltyrǵy jyldyń shilde aıynda 16 jastaǵy qyz bala týǵan kúnge baryp, otyrystan keıin óziniń ápkesine úıine qonýǵa shyqqan. Jolda adasyp, ápkesiniń tanystaryn kezdestirgen. Olar oǵan taksı shaqyryp úıge jetkizemiz dep ýáde bergen. Alaıda úsh jigit jasóspirim qyzdy aldap, páterge kirgizgen. Jasóspirim qyz zorlanǵan. Keıin ol 10-shy qabattan sekirip ketken. Aǵashtardyń ústine qulaǵandyqtan aman qalǵan, alaıda qatty zardap shekken. Birneshe aı boıy aýrýhanada jatty. Eki kúdikti byltyrǵy jyldyń shilde aıynda, al úshinshi kúdikti qańtarda qamaýǵa alyndy.