Zooqorǵaýshylar Instagram-dy jabaıy janýarlarmen selfıdi nasıhattamaýǵa shaqyrdy
ASTANA. QazAqparat - Búkilálemdik janýarlardy qorǵaý qoǵamy (BJQQ) Instagram áleýmettik jelisiniń ákimshiligin selfı jasaý úshin jabaıy janýarlardy tabıǵı mekeninen alyp ketip, jıirkenishti jaǵdaıda ustap otyrýǵa qarsy kúresý úshin sharalar qoldanýdy surady. Bul týraly The Guardian habarlady.
BJQQ derekteri boıynsha, 2014 jyly ekzotıkalyq janýarlarmen jasalǵan Instagram-daǵy selfıler sany 292%-ǵa ósken. Sonyń ishinde, týrısterdiń qushaqtap nemese ustap túsken sýretteriniń úlesi 40%-y quraıdy.
BJQQ belsendileri atap ótkendeı, Brazılııa men Perýde jergilikti týragenttikterdiń qyzmetkerleri týrısterdiń túsken sýretteri arqyly paıda tabý úshin janýarlardy zańsyz aýlaýmen aınalysýda. Kóptegen janýarlar jarty jyldan keıin alǵan jaraqattary men shóldeýi saldarynan óledi.
«Biz Instagram-dy janýarlarǵa zııan keltiretin zańsyz áreketterdi nasıhattaý nemese uıymdastyrý úshin qoldanýǵa tyıym salamyz. Biz brakonerlikke yqpal etetin nemese janýarlarǵa qatysty zorlyq-zombylyqty beıneleıtin shaǵymdar túsken kontentterdi óshiremiz», - dep habarlady Instagram ókilderi.
Aldaǵy ýaqytta BJQQ belsendileri «Jabaıy tabıǵatpen sefı jasaý kodeksin» jasap shyǵarýdy josparlaýda. Onda ekzotıkalyq janýarlarmen qaýipsiz jáne etıkalyq sýretke túsý erejeleri qalyptastyrylady.
Foto: © World Animal Protection
