Kóshpeli zoobaq pen tsırk qyzmetine tyıym salyndy: qazir janýarlar qaıda
ASTANA. KAZINFORM — Elimizde kóshpeli haıýanattar baǵy men tsırkter qyzmetine tyıym salynǵan. Kazinform agenttigi atalǵan qyzmettiń qazirgi jaǵdaıy men tyıymnyń oryndalýy barysyna sholý jasaǵan edi.
Eske salaıyq, byltyr jeltoqsanda Úkimet otyrysynan keıin ótken baspasóz máslıhatynda Ekologııa jáne tabıǵı resýrstar mınıstri Erlan Nysanbaev bıyl 1 qańtardan bastap Qazaqstanda kóshpeli tsırkter men zoobaqtarǵa tyıym salynatynyn málim etti.
Osylaısha Qazaqstan Respýblıkasynyń «Janýarlarǵa jaýapkershilikpen qaraý týraly» 2021 jylǵy 30 jeltoqsandaǵy № 97-VII Zańynyń 18-babynyń 6-tarmaǵyna sáıkes 2025 jylǵy 1 qańtardan bastap kóshpeli tsırkter qyzmetine tyıym salyndy.
Qazir janýarlar qaıda?
— Kórsetilgen merzimde qyzmetin toqtatpaǵan jáne qujattaryn zań talaptaryna sáıkes keltirmegen jaǵdaıda másele jergilikti atqarýshy organdardyń ótinishi boıynsha sot tártibimen taratylady. Zańnyń 4-babynyń 3-tarmaǵyna sáıkes eger janýardy nysanaly maqsaty boıynsha odan ári paıdalaný múmkin bolmasa, janýardyń ıesi nemese jaýapty adam janýardy ózdiginen ólgenge deıin baǵýdy qamtamasyz etýge nemese janýarlarǵa arnalǵan panajaıǵa, qajetti jaǵdaılar jasaı alatyn jeke nemese zańdy tulǵalarǵa berýge mindetti, — degen jaýap aldyq Ekologııa jáne tabıǵı resýrstar mınıstrliginen.
Degenmen, mınıstrlik 1 qańtarda kúshine engen tyıymdy buzǵan jaǵdaıda, kóshpeli haıýanattar baǵy men kóshpeli tsırkter qyzmetine ákimshilik nemese qylmystyq jaýapkershilik qarastyrylmaǵanyn aıtyp otyr.
Sondaı-aq qoldanystaǵy zańnamaǵa sáıkes, janýarlardy qoldanatyn kóshpeli tsırk pen kóshpeli haıýanattar qyzmetine memlekettik qoldaý qarastyrylmaǵan. Odan bólek, Ekologııa mınıstrligi el aýmaǵynda qansha kóshpeli haıýanattar baǵy men kóshpeli tsırkter baryna sanaq júrgizbeıtin bolyp shyqty.
Mınıstrlik zańmen salynǵan tyıymdy qalaı baqylap otyr
— «Janýarlarǵa jaýapkershilikpen qaraý týraly» zańnyń 27-babyna sáıkes qoǵamdyq ınspektorlar jáne jarǵysynda janýarlarǵa jaýapkershilikpen qaraý salasynda qoǵamdyq baqylaý júrgizý jónindegi qyzmetti usynatyn kommertsııalyq emes uıymdar Qazaqstan Respýblıkasynyń zańnamasyna sáıkes júzege asyrady. Janýarlarǵa jaýapkershilikpen qaraý salasyndaǵy qoǵamdyq baqylaý erikti jáne óteýsiz negizde júzege asyrylady, — delingen resmı saýal jaýabynda.
Eske salaıyq, elimizdiń birneshe óńirinde janýarlardy ustaýǵa qatysty shý shyqqan edi. Ótken jyly aqshaǵa qunyǵyp, ańdardy azaptaǵan Aqtaýdaǵy jyljymaly zoobaqqa tekseris júrgizildi.
Sondaı-aq, Qaraǵandyda zoobaq qyzmetkerleri arystannyń eki kúshigin satpaq bolǵan áreketi týraly jazǵan edik.
Odan bólek, 2019 jyly Almatyda janýarlardyń óliminen soń zoobaq qyzmetkerleri jumystan qýyldy.