Zoobaq qabyldaýdan bas tartqan qusty óskemendik áıel úıinde asyrap otyr

ÓSKEMEN. QazAqparat – Óskemen qalasynyń turǵyny jaraly kezquıryqty qamqorlyǵyna aldy, dep habarlaıdy QazAqparat tilshisi.

«Dvorıanın» janýarlar quqyǵyn qorǵaý qoǵamdyq qorynyń málimetinshe, Óskemen qalasynyń turǵyny úıiniń aýlasynda usha almaı júrgen kezquıryqty baıqaǵan. Áıel qusty úıine ákelip, janýarlar quqyǵyn qorǵaýshylardan kómek surady. Sodan keıin qus veterınarlyq klınıkaǵa jetkizildi.

«Belgili bolǵandaı, qustyń qanaty synǵan. Ony bireý atyp túsirgen syńaıly. Qusty tabıǵatqa jiberýge kelmeıdi», - delingen aqparatta.

Qala turǵyny qanatty janýardy Óskemendegi zoobaqqa ótkizbek bolǵan. Alaıda ol jaqta qabyldaýdan bas tartylǵan.

«Sondyqtan áıel kezquıryqty óz qamqorlyǵyna aldy. Ol qusqa Tanym dep at qoıdy. Qazir qustyń jaǵdaıy jaqsy», - delingen habarlamada.