Zoobaq fotosessııa úshin paıdalanylǵan arystannyń kúshigin satyp aldy
ALMATY. QazAqparat - Zoobaq basshylyǵy naýqas janýardy jekemenshik ıelerinen satyp aldy, dep habarlaıdy QazAqparat tilshisi.
Bul týraly zoobaq dırektory Erjan Erkinbaev Feısbýktegi paraqshasynda málimdedi.
«Búgin arystannyń kúshigin qabyldadyq. Álıdi 2 aı buryn burynǵy ıelerinen satyp alǵan bolatynbyz. Osy ýaqytqa deıin janýar em qabyldady.
Burynǵy qojaıyndary janýardy kútip baptamaǵan. Álıde rahıt belgisi aıqyn, aǵzalary ýlanǵan, baýyry 3 ese úlkeıgen, tyrnaqtary túbinen kesilgen, jambasy synǵan. Qazir aqyryndap salmaq jınap keledi. Ol úshin kúresetin bolamyz», - dedi E.Erkinbaev.
Aıta ketý kerek, burynǵy qojaıyndary arystannyń kúshigin fotosessııaǵa paıdalanyp aqsha tapqan. Janýarlardy qorǵaý uıymdarynyń ókilderi jyrtqyshtyń múshkil halin aıtyp dabyl qaqqan bolatyn.
