Zombylyq - jeke problema emes, ol qoǵamdyq másele - Bas prokýror
Jıyn barysynda baıandama jasaǵan Bas prokýror ómirden birneshe mysal keltirdi. «Kúıeýim, qaınaǵam, atam 11 jyl boıy uryp-soqty dep, Shemonaıhada bir kelinshek kishkentaı úsh balasyn asyp óltirip, ózi de darǵa asylǵan. Túrkistanda úı ıesi 6 adamdy - anasyn, áıelin, 5 jasar qyzy men ulyn, eki baýyryn óltirýge umtylǵan. Sheshesi men uly tiri qalyp, tórteýi qaza tapty. Astanada burynǵy áıeliniń ústine benzın quıyp, órtep jibergen. Kishkentaı tórt bala jetim qaldy. Qyzylordanyń Josaly kentinde aıtqanyma kónbedi dep, áıelin baılap, atpen súırep óltirgen. Statıstıka boıynsha ótken jyly úı-jaılarda 308 adam kóz jumdy. Bul jalpy kisi óltirýdiń úshten biri», - degen Bas prokýror zorlyq-zombylyqtyń basqa da soraqy túrleri kóp ekenin alǵa tartty.
Onyń aıtýynsha, tek bıyldyń ózinde 316 áıel ózine qol salǵan. Al, búginde túrmede 300 áıel otbasyndaǵy janjal kezinde adam óltirgeni úshin jazasyn óteýde. «Qanshama shańyraq shaıqalyp, kerege sógildi, balalar jetim qaldy. Eńbek etýge erinip, áıeliniń tapqan aqshasyn ishimdik pen esirtkige jumsap, balalaryn ash-jalańash qýyp shyqqan azamattar az emes. Otbasynan bezinip, alıment tóleýden qashyp júrgender qanshama. Osyndaı jan túrshigetin jaǵdaılarǵa ne sebep? Jalpy, bul másele uzaq jyldar aıtylmaı keldi. Áleýmettik problema retinde qaralmady. Otbasy ár adamnyń jeke sharýasy degen kózqarasty ustandyq. Jabýly qazan jabýly kúıinde qalsyn dedik. Bul burynnan kele jatqan, qanymyzǵa sińgen jaman dert», - dedi J. Asanov.
Onyń pikirinshe, kóshedegi agressııanyń da bir ushy otbasyndaǵy jaǵdaımen baılanysty. Úıden yzamen shyqqan adam óshin ózgeden alady. Qoǵamdyq jerde, kólikte, kezekte, tipti demalys sátterinde de jurt shydamsyz, ashýly.
«Zombylyq - jeke problema emes, ol qoǵamdyq másele. Jumyssyzdyq, qylmystar, ózge de keleńsiz jaǵdaılar otbasyndaǵy ahýalǵa tikeleı qatysty», - dedi Bas prokýror.
