Zohran Mamdanı mer bolǵan jaǵdaıda Tramp Nıý-Iork qalasyn qarjylandyrýdy qysqartady
ASTANA. KAZINFORM – AQSh prezıdenti Donald Tramp Nıý-Iork turǵyndaryn demokrat Zohran Mamdanıdi mer etip saılaýdan saqtandyrdy. Ol halyqty táýelsiz kandıdat Endrıý Kýomoǵa daýys berýge shaqyryp, áıtpese qalany qarjylandyrýdy qysqartamyn dep qorqytty, dep habarlaıdy DW aqparat agenttigi.
Ol birneshe ret kommýnıst dep ataǵan Mamdanı jeńiske jetken jaǵdaıda Aq úı qalaǵa zańmen belgilengen eń az mólsherden tys federaldy qarajat bólýi ekitalaı ekenin aıtty.
— Endrıý Kýomo unasa da, unamasa da, sizde is júzinde basqa tańdaý joq. Siz oǵan daýys berýińiz kerek, — dep jazdy Tramp dúısenbi, 3 qarashada Truth Social áleýmettik jelisinde.
Daýys berý 4 qarashada ótedi. Saýalnamalar Mamdanıdiń Kýomo men respýblıkashyl kandıdat Kertıs Slıvadan alda ekenin kórsetti.
Mamdanı Trampty qarsylasyn qoldaǵanyn synǵa aldy.
— MAGA («Amerıkaǵa qaıta dańq ákeleıik») qozǵalysyn qoldaý arqyly Endrıý Kýomony qoldaýy Donald Tramptyń onyń ózine eń qolaıly mer ekenin túsinetinin kórsetedi, — dedi Mamdanı. — Tramp pen Kýomonyń donorlary birdeı, kózqarastary uqsas jáne óz áreketterine jaýapkershilik sezimi joq, — dep málimdedi Mamdanı.
Rezonansty saılaý
Nıý-Iork qalasyndaǵy saılaý búkil el boıynsha qyzyǵýshylyq týdyrdy, sebebi onyń qorytyndysy Demokratııalyq partııanyń bedeline áser etýi múmkin.
Ózin demokratııalyq sotsıalıst dep ataıtyn otyz tórt jastaǵy Mamdanı progressıvti elektoratty tarta aldy, biraq birqalypty demokrattardy alańdatty. Onyń saılaýaldy baǵdarlamasyna qalanyń eń dáýletti turǵyndary úshin salyqty kóterý jáne memlekettik turǵyn úıdi keńeıtý kirip otyr.
Mamdanı Demokratııalyq partııanyń praımerızinde kútpegen jerden Kýomony jeńdi. Endi Demokratııalyq partııanyń kópten bergi múshesi bolǵan Kýomo táýelsiz saılaýǵa kandıdat retinde túsip jatyr. Ol 2021 jyly Nıý-Iork shtaty Bas prokýrorynyń on bir áıelge jynystyq qysym kórsetti degen aıyptaýyna baılanysty esebi jarııalanǵannan keıin gýbernatorlyq qyzmetinen ketti.
Nıý-Iork qalasy Esep berý palatasynyń málimetinshe, qalanyń federaldyq qarajaty shamamen 7,4 mlrd dollardy quraıdy, bul qala bıýdjetiniń 6,4 paıyzyna teń. Ekinshi merzimi kezinde Tramp saıası sebeptermen ártúrli baǵdarlamalarǵa federaldyq qarjylandyrýdy toqtata turamyn dep birneshe ret qorqytty.
Buǵan deıin Nıý-Iork qala merin saılaýǵa daıyndalyp jatqanyn jazǵan bolatynbyz.
Nıý-Iork meri qyzmetine kim úmitker ekenin myna materıaldan oqı alasyz.