Zilzaladan keıin: Gazıantepte Qazaqstan salǵan 960 oryndyq mektep ashyldy
ASTANA. KAZINFORM — Qazaqstannyń Túrkııadaǵy joıqyn jer silkinisinen keıin salǵan Qoja Ahmet ıAsaýı atyndaǵy mektebi alǵashqy oqýshylaryn qabyldady. Bilim ordasy Gazıantep provıntsııasynyń Nurdaǵy aýdanynda boı kóterdi.
Memleket basshysy Qasym-Jomart Toqaev 2023 jyldyń 6 aqpanyndaǵy joıqyn zilzaladan keıin jańa mektep salý bastamasyn kótergen edi. Joba zardap shekken óńirdi qalpyna keltirýge Qazaqstannyń qosqan úlesin kórsetip, eki el arasyndaǵy baýyrlastyq pen ózara qoldaýdyń sımvolyna aınaldy.
Mekteptiń saltanatty ashylýyna KazAID Basqarma tóraǵasy Nurǵalı Arystanov, Gazıantep provıntsııasy gýbernatorynyń orynbasary ıAkýp Kylynchoglý, jergilikti jurtshylyq ókilderi, ata-analar men oqýshylar qatysqan.
Jańa bilim berý mekemesi 6 myń sharshy metrdi quraıdy jáne 960 oqýshyǵa arnalǵan. Munda 32 bastaýysh synyp jáne mektepke deıingi bilim berýge arnalǵan 4 synyp qarastyrylǵan. Qazir mektepte 50 pedagog eńbek etedi.
Oqý ornynda oqýshylarǵa sapaly bilim alýǵa jáne jan-jaqty damýyna qajetti zamanaýı ınfraqurylym jasalyp, oqý úderisine qolaıly jaǵdaılar qamtamasyz etilgen. Munda mamandandyrylǵan synyptar, konferents-zal, kitaphana, amfıteatr, sport alańy jáne balalardyń oıyn aımaǵy bar.
Ǵımarat Túrkııa normalaryna saı jobalanǵan. Seısmıkalyq qaýipsizdikke, ylǵaldan jáne jylýdan qorǵaýǵa erekshe kóńil bólingen.
Sapar barysynda KazAID Basqarma tóraǵasy Nurǵalı Arystanov Gazıantep provıntsııasy gýbernatorynyń orynbasary ıAkýp Kylynchoglýmen kezdesti. Taraptar ekijaqty ózara is-qımyldyń perspektıvalaryn jáne aldaǵy yntymaqtastyqtyń yqtımal baǵyttaryn talqylady.
Aıta keteıik, Túrkııa mektepterinde túrki álemine arnalǵan jańa kýrs engizildi.
