Zilzala kezinde qıraǵan úıdiń shyǵynyn kim óteıdi
ASTANA. KAZINFORM — Tótenshe jaǵdaılar mınıstrligi resmı saýalymyzǵa joldaǵan jaýabynda jer silkinisi saldarynan qıraǵan ǵımarattar úshin ótemaqy tóleýge kim jaýapty ekeni jóninde málimet berdi.
— Búginde Qazaqstanda nuqsandy óteý tártibi «Azamattyq qorǵaý týraly» zańnyń 58-babymen jáne TJM-nyń 2026 jylǵy 31 naýryzdaǵy № 143 buıryǵymen (2026 jylǵy 1 shildeden bastap qoldanysqa engizildi) bekitilgen Zııandy (zalaldy) óteý qaǵıdalarymen retteledi. «Azamattyq qorǵaý týraly» zańnyń 58-babyna sáıkes, tabıǵı sıpattaǵy tótenshe jaǵdaılar saldarynan zardap shekkenderge keltirilgen zalal ýákiletti organ aıqyndaıtyn tártippen óteledi, — delingen habarlamada.
Mınıstrliktiń málimetinshe, aldymen, shyǵynnyń mólsherin anyqtaý úshin jergilikti atqarýshy organ arnaıy komıssııa qurady. Turǵyn úı zaqymdanǵan jaǵdaıda tehnıkalyq tekserý júrgizilip, keltirilgen nuqsan baǵalanady. Zańnamada belgilengen shekteýler de eskeriledi. Osyndaı is-sharalardan soń, ótemaqy kólemi belgilenedi.
Múlik saqtandyrylǵan bolsa, ótemaqyny saqtandyrý uıymy qamtamasyz etedi. Al zańsyz salynǵan nysandar men jyljymaıtyn múlikke jatpaıtyn ýaqytsha qurylystar úshin ótemaqy tólenbeıdi. Sondyqtan úıdi ruqsat etilgen jerge, zańdy jolmen salý jáne saqtandyrý mańyzdy.
— Qazirgi ýaqytta árbir azamat óz ómirin, múlkin nemese jyljymaıtyn múlkin kez kelgen saqtandyrý kompanııasynda erikti túrde saqtandyrýǵa quqyly. Sondaı-aq, 2026 jyly Memleket basshysy «Saqtandyrý qyzmeti týraly» zań jobasyn ázirleýdi tapsyrdy, onda dúleı zilzalalardan turǵyn úıdi mindetti saqtandyrý normalary jeke blok retinde kózdeledi. Atalǵan zań jobasyn Qarjy naryǵyn retteý jáne damytý agenttigi ázirlep jatyr. Onda turǵyn úılerdi jer silkinisinen, orman órtterinen, sý tasqyny men sý basýdan mindetti saqtandyrý qarastyrylady, — dep málimdedi TJM.
Aıta keteıik, buǵan deıin ǵımarattyń seısmıkalyq tózimdiligin qalaı bilýge bolatynyn jazǵanbyz.
