Zııatkerlik menshikti damytýǵa baǵdarlanǵan zań jobasy maquldandy
TANA. 26 qazan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine zııatkerlik menshikti damytý men qorǵaý tetikterin jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Aldyńǵy qatarly sandyq, aqparattyq tehnologııalardy keńinen paıdalaný tek Qazaqstanda ǵana emes, sondaı-aq búkil álemde zııatkerlik menshik týraly zańnamany odan ári damytýǵa eleýli áser etip otyr. Osyǵan baılanysty ıntelektýaldyq menshik quqyǵynyń qazirgi zamanǵy problemalaryn zań arqyly sheshý úshin múldem basqa, jańa ustanymdardy qalyptastyrý qajet bolady. Osy máseleler eskerile otyryp, zııatkerlik menshikti damytý men qorǵaý tetigin jetildirýge baǵyttalǵan zań jobasy ázirlengen.
Atalǵan zań jobasy patentik quqyqtyń negizgi prıntsıpterin ózgertýdi, zııatkerlik menshik quqyǵynyń keıbir dástúrli nysandaryna degen kózqarasty qaıta qaraýdy kózdeıdi. Bul rette avtorlyq quqyqtardy qorǵaý týraly qaǵıdalar týyndylardy ınternettiń aqparattyq jelisinde jáne ózge de baılanys jelilerinde paıdalanýǵa baǵdarlanbaǵan. Sondaı-aq, avtorlyq jáne sabaqtas quqyqtardy qorǵaýdy qamtamasyz etý maqsatynda ınternet jelisinde týyndylardy kóshirýge jáne taratýǵa zańsyz ruqsat bergeni jáne taratqany úshin de jaýapkerlik týyndaıtynyn naqtylaý usynylady.
