Zııatkerlik menshikti damytý men qorǵaýdyń jańa tetikteri
ASTANA. 19 tamyz. QazAqparat. Búgin Qazaqstan Respýblıkasynyń Premer-Mınıstri K. Másimovke «Qazaqstan Respýblıkasynyń keıbir zańnamalyq aktilerine zııatkerlik menshikti damytý men qorǵaý tetikterin jetildirý máseleleri boıynsha ózgerister men tolyqtyrýlar engizý týraly» zań jobasy tanystyryldy,
dep habarlady Ádilet mınıstrliginiń baspasóz qyzmeti.
Ádilet mınıstri R. Túsipbekov zań jobasyn usyna otyryp, onyń Memleket basshysynyń 2011 jylǵy 17 sáýirde Úkimettiń keńeıtilgen otyrysynda bergen tapsyrmasyn oryndaý maqsatynda ázirlengenin atap ótti.
Zań jobasynyń maqsaty zııatkerlik menshikti damytý men qorǵaý tetikterin odan ári jetildirý bolyp tabylady.
Bul úshin Qylmystyq kodeks, Azamattyq kodeks (erekshe bólik), Ákimshilik quqyq buzýshylyq týraly kodeksterge, «Avtorlyq quqyq jáne sabaqtas quqyqtar týraly», «Taýar tańbalary, qyzmet kórsetý tańbalary jáne taýarlardyń shyqqan jeriniń ataýlary týraly» zańdary men «Patent zańyna» ózgerister engizilip otyr.
Zań jobasymen avtorlyq quqyq jáne sabaqtas quqyqtar obektilerin qorǵaý maqsatynda elektrondyq, sandyq nysandaǵy týyndylardyń jáne (nemese) fonogrammalardyń kontrafaktilik danalarymen almasýǵa, saqtaýǵa, taratýǵa odan ári qol jetkizý úshin ınternet-resýrstaryn jasaý jáne uıymdastyrý arqyly avtorlyq quqyq jáne sabaqtas quqyqtar obektilerin zańsyz paıdalanǵany úshin jaýapkershilik belgileý usynylady.
Avtorlardy avtorlyq quqyq jáne sabaqtas quqyqtardyń jańa obektilerin jasaýǵa yntalandyrý úshin qosymsha jaǵdaı jasaý jóninde erejeler kózdelgen.
Zań jobasy taýar tańbalaryn tirkeý týraly ótinimderge aldyn ala saraptama jasaý merzimin eki aıdan bir aıǵa deıin qysqartýdy jáne taýar tańbalaryn tirkeýden bas tartý úshin 13 absolıýttik negizdiń 9-yn alyp tastaýdy kózdeıdi.
R. Túsipbekov atap ótkendeı, atalǵan ózgerister Ádilet mınıstrliginiń bıznesti damytý úshin ákimshilik kedergilerdi qysqartý jónindegi baǵytyn jalǵastyrady.
