Zııatkerlik menshik týraly zańǵa «geografııalyq kórsetkish» uǵymy qosyldy

NUR-SULTAN. QazAqparat – «Zııatkerlik menshik týraly» zańǵa birqatar túzetý engizildi. Bul týraly QR Ádilet vıtse-mınıstri Aqerke Ahmetova aıtty, dep habarlaıdy QazAqparat tilshisi.

«Ujymdyq negizde menshik quqyǵyn basqaratyn uıymdar qyzmetiniń ashyqtyǵy men tıimdiligin arttyrý maqsatynda túzetýler engizildi. Avtorlar men avtorlyq quqyq ıeleriniń tájirıbelerin, shaǵymdaryn taldaý uıymdardyń mindetterin naqtylaýdy qajet etetindigin kórsetti. Túzetýler 9 myńǵa jýyq qazaqstandyq avtor men avtorlyq quqyq ıeleriniń tıisti syıaqylaryn alýǵa degen úmitin kórsetedi jáne ujymdyq uıymdardyń olardyń quqyqtaryn buzýyn joıýǵa baǵyttalǵan», - dedi Aqerke Ahmetova Ortalyq kommýnıkatsııalar qyzmetinde ótken baspasóz máslıhatynda.

Ádilet mınıstrliginiń málimetine sáıkes, zań jobasy boıynsha barlyq múddeli taraptardyń – avtorlar men quqyq ıeleriniń, patenttik senim bildirilgen ókilderdiń, ǵalymdardyń, ujymdyq uıymdardyń, múddeli memlekettik organdardyń jáne «Atameken» UKP ókilderiniń qatysýymen jan-jaqty talqylaý ótti.

«Sonymen qatar, jańa nysan – «geografııalyq kórsetkish» engizildi. Bul túzetý otandyq óndirýshilerge jańa múmkindiktermen álemdik naryqqa shyǵýǵa jol ashady. Bul jaǵdaıda taýardyń bedeli men sapasy belgili bir geografııalyq nysanmen baılanysty. Mysaly, «Qazaqstan shokolady», «Langer balmuzdaǵy» jáne taǵy basqalary», - dedi vıtse-mınıstr.