Zııatkerlik mektepti bir «nashar» baǵasy bar túlek bitire almaıdy
ASTANA. QazAqparat - QR Prezıdenti N.Á. Nazarbaevtyń bastamasy boıynsha 2008 jyly Astanada alǵashqy zııatkerlik mektebi ashyldy. Bes jyldyń ishinde Zııatkerlik mektepteri elimizdiń barlyq óńirlerinde ashylǵan edi. Búginde bundaı bilim oshaqtary bas shahardan bólek Kókshetaý, Taldyqorǵan, Semeı, Óskemen, Oral, Aqtóbe, Qaraǵandy, Shymkent, Taraz, Qyzylorda, Pavlodar, Atyraý, Qostanaı, Petropavl, Aqtaý jáne ońtústik astanamyz Almaty qalalarynda jumys istep tur.
Zııatkerlik mektepterinde joǵary bilikti pedagogtar dáris beredi, mektep zamanaýı ǵylymı-zerthanalyq jáne ınteraktıvti mýltımedııalyq jabdyqpen jaraqtandyrylǵan. Zııatkerlik mektebiniń osy jáne basqa da erekshelikteri balalardyń jan-jaqty damýyna jaǵdaı jasaıdy.
Nazarbaev Zııatkerlik mektepteri 1-synyptan bastap 11-synypqa deıin balalardy oqýǵa qabyldaıdy. Oqý úsh tilde júrgiziledi - qazaq, orys jáne aǵylshyn tilderinde. Mekteptiń eki negizgi baǵyty bar - fızıka-matematıkalyq jáne hımııa-bıologııalyq baǵyttar. Elimizde tek Almaty, Shymkent, Astana qalalarynda ǵana osy eki baǵyttaǵy mektepter qatar jumys istep tur.
1-synypqa qalaı túsýge bolady?
Oqýǵa túsý úshin barlyq balalar eki kezeńnen turatyn konkýrstyq irikteýden ótýge tıis. Alaıda 1-synyp oqýshylary úshin bul talap jaramsyz ekeni aıtpasa da túsinikti. Osy tusta ár ata-ana balasyn Zııatkerlik mektepke 1-synypqa qalaı bersem bolady degen suraqqa jaýap izdeıdi. Oǵan jaýap: 1-synypqa túsý Zııatkerlik mektebiniń janyndaǵy bala baqshadan bastaýysh mektepke konkýrstan tys tikeleı aýystyrý arqyly iske asyrylady. Bul rette, túser aldynda balalar psıhologııa-pedagogıkalyq tekserýden ótedi.
2-6-synyptarǵa oqýǵa túsý sharty bólek. Munda:
- matematıka;
- qazaq tili;
- orys tili;
- dúnıetaný (2 - 4-synyp úmitkerleri úshin);
- aǵylshyn tili pánderinen konkýrstyq irikteý ótedi.
Oqýshylar synnyń ekinshi deńgeıine ótý úshin 30 baldan joǵary upaı jınaýy tıis. Birinshi kezeńniń nátıjeleri jarııalanǵannan keıin eki kún ótken soń ekinshi kezeń ótkiziledi. Osy kezeńniń negizgi maqsaty - matematıka boıynsha Zııatkerlik mektebinde oqýǵa degen daıarlyq deńgeıin anyqtaý. Bul jerde eskeretin jaıt, 5-6-synyp oqýshylary úshin ekinshi kezeńge ótýge 15 baldan joǵary upaı jınaýy kerek.
7 - 11(12)-synyptarǵa oqýǵa túsý kezinde úmitker oqýshylar QR Birinshi Prezıdentiniń «Órken» bilim berý grantyn jeńip alý úshin baq synaıdy. Grant daryndy balalarǵa arnalǵan jáne bilim alýshynyń oqý aqysyn tolyq óteıdi. Grantty konkýrstyq irikteýden tabysty ótken kezde alýǵa bolady. Konkýrs eki kezeńnen turady.
Birinshi kezeńde Zııatkerlik mektepteriniń baǵyttaryna sáıkes keletin beıindi pánder boıynsha, sondaı-aq qazaq, orys jáne aǵylshyn tilderi boıynsha keshendi testileý ótkiziledi.
Konkýrstyń ekinshi kezeńi birinshi kezeń ótkizilgennen keıin eki kúnnen soń ótkiziledi. Ekinshi kezeńge jalpy suraqtar sanynan durys jaýaptardyń qyryq jáne odan da kóp paıyzyn jınaǵan úmitkerler jiberiledi.
Ekinshi kezeńde mektepterdiń baǵyttaryna sáıkes keletin beıindi pánder boıynsha jazbasha emtıhandar ótkiziledi.
Jazbasha jumys ár pán boıynsha úsh deńgeıli kúrdeliligi (A, V, S) bar 5 tapsyrmadan turady. Al konkýrs nátıjeleri mektep ǵımaratyndaǵy stendterde nemese «Nazarbaev zııatkerlik mektepteri» saıtynda ornalastyrylady. Qajetti ball sanyn jınaǵan, biraq bos oryndarynyń bolmaýyna baılanysty Zııatkerlik mektebine qabyldanbaǵan úmitkerler rezerv tizimine engiziledi. Osy tizim de «Nazarbaev Zııatkerlik mektepteri» saıtynda ornalastyrylady. Eger oqý jyly ishinde oryn bosaǵan jaǵdaıda, Zııatkerlik mektebiniń dırektory rezervtik tizimdegi úmitkerdi konkýrstyq irikteýsiz qabyldaýǵa quqyly.
7-11 synyptarda aqyly negizde oqý qarastyrylmaıdy, osy synyptardyń barlyq úmitkerleri «Órken» bilim berý granty boıynsha oqıdy. Eger oqýshy «Órken» grantynyń ıesi bolyp, oqý jylynyń sońynda úlgerim tabelinde eń bolmasa bir «nashar» baǵasy bolsa, onda ol grantynan avtomattyq túrde aıyrylady. Bul rette, grantty mektep jyl saıyn ótkizetin konkýrstan ótý nátıjeleri boıynsha qaıta alýǵa bolady.
Erbol Janat
