Zııatkerlik mektepter 2011 jyly 160 onlaın-sabaq ótkizdi
ASTANA. 13 aqpan. QazAqparat - Zııatkerlik mektepterdiń tájirıbelerin taratý maqsatynda 2011 jyly oqýshylar úshin 160 onlaın-sabaq jáne pedagogtar úshin 17 onlaın-semınar ótkizildi,
dep habarlady «Nazarbaev Zııatkerlik mektepteri» AQ-nyń baspasóz qyzmetinen.
Baspasóz qyzmetiniń aqparaty boıynsha, 2011 jyldyń 1 qyrkúıeginen bastap «Nazarbaev Zııatkerlik mektepterinde» jalpy bilim beretin mektepterdiń muǵalimderine arnalǵan onlaın-semınarlar jáne oqýshylarǵa arnalǵan onlaın-sabaqtar ótkizile bastady. Bul jobalar mektepterdegi sabaq berýdiń sapasyn arttyrýǵa baǵyttalyp otyr. Oqýshylar úshin matematıka, fızıka, hımııa, bıologııa pánderi boıynsha sabaqtar ótkizilse, muǵalimder úshin «Synı baǵalaý» taqyrybyna arnalǵan semınarlar ótkizilýde.
Onlaın-sabaqtar men semınarlar QR Bilim jáne ǵylym mınıstrliginiń ELP portaly (elp.kz) arqyly jáne Eluminate Live baǵdarlamalyq qamtýdyń negizinde ótkizilýde. Aıta ketý kerek, bul baǵdarlama álemniń 150-den astam elinde keńinen paıdalanylady jáne Illınoıs, Aıova, Pıtsbýrg jáne t.b. kóptegen ýnıversıtetterde qashyqtyqtan oqytýda qoldanylady.
«2011 jyly 160 onlaın-sabaq jáne 17 onlaın-semınar ótkizildi. 2012-2013 oqý jylynda synı oılaý, elektıvti kýrstar baǵdarlamalaryn jasaý, onlaın-sabaqtar men semınarlardy baǵalaý ólshemderin daıyndaý taqyryptary boıynsha onlaın-semınarlar ótkizý josparlanýda»,- delingen «Nazarbaev Zııatkerlik mektepteri» AQ-nyń baspasóz qyzmetiniń habarlamasynda.
