Zııatkerlik mektep oqýshylary Kanada men AQSh-taǵy qatarlastaryn basyp ozdy
«Ózderińiz bilesizder, el óńirlerin aralaǵan kezde Zııatkerlik mektepterge barǵandy jaqsy kóremin. Sonda alystaǵy shalǵaı aýyldardyń balalary, múmkinshiligi az otbasylardyń, ata-ana qamqorlyǵynsyz qalǵan jetkinshekterdiń ózderiniń bilimimen osy mektepke túsip jatqany qýantady. Bul jerde eshqandaı basqa tańdaý joq, tek qana bilimge ekpin qoıylady. Osy oqý ornyn tańdaǵandar úzdik ekenin kórsete bilýi kerek», - dedi Elbasy.
Elbasy Nazarbaev Zııatkerlik mektepteriniń oqýshylary matematıkalyq saýattylyq jaǵynan úzdik elder qataryna engenin eske saldy.
«Olar Sıngapýr, Japonııa elderindegi úzdik tanylǵan qatarlastaryna básekeles bola alady. Sonymen qatar Kanada, Fınlıandııa jáne AQSh-taǵy oqýshylardy basyp ozdy. Bul óz kezeginde aldyńǵy qatarly ádistemeler men oqytý tártibin, oqýshylardy irikteýdiń júıesin engizýdiń nátıjesi», - dedi Prezıdent.
Memleket basshysy Zııatkerlik mektepterde elimizdiń barlyq óńirlerinen balalar bilim alyp jatqanyn atap ótti. Olardyń 3 myńnan astamy kópbalaly jáne az qamtylǵan otbasylardan, 2,5 myńy aýyldyq jerler men shaǵyn qalalardan tartylǵan oqýshylar.
«Atap aıtqanda, bul áleýmettik ádildiktiń naqty kórsetkishi. Sáıkesinshe, árbir talantty balanyń ózin kórsetýine múmkindik berilgen. Tek bilimimen ádil túrde oqýǵa túse alady», - dedi Nursultan Nazarbaev.
Eske salaıyq, Astanada Elbasynyń qatysýymen «Nazarbaev Zııatkerlik mektepteri» derbes bilim berý uıymynyń 10 jyldyǵyna arnalǵan «Uly dala muragerleri» atty oqýshylar men pedagogtardyń forýmy ótip jatyr.
Zııatkerlik mektepter qurý jónindegi joba 2008 jyldyń naýryz aıynan júzege asyryla bastady. Búginde elimizde jaratylystaný-matematıka baǵytyndaǵy 20 Zııatkerlik mektep ashyldy. 2010-2018 jyldar aralyǵynda osy oqý oryndaryn 8 myńǵa jýyq túlek támamdady. 950 oqýshy «Altyn belgi» men erekshe attestatqa ıe boldy.
