Zııansyz kórinetin mobıldik qosymshalar balany ózine táýeldi etýi múmkin - Shavkat Sabırov

NUR-SULTAN. QazAqparat - Koronavırýs indetinen qorǵanǵandaı, kıberkeńistikke de ózine tán maska men sanıtaızeri, ıaǵnı qorǵanys quraldary bolýy kerek. Bul týraly Ortalyq kommýnıkatsııalar ortalyǵynda «Ózińdi jáne jaqyndaryńyzdy býllıng jáne kıberbýllıngten qalaı qorǵaýǵa bolady» taqyrybynda ótken brıfıngte aıtyldy, dep habarlaıdy QazAqparat tilshisi.

«Balaǵa planshetti bergen kezdegi maqsatyńyz ýaqytyńyzdy ózińizge, dostaryńyzben sóılesýge arnaý bolsa - keıin úlken problemaǵa tap bolasyz. Balańyzdyń qolyna planshet ustatqan sátten bastap qaýipsizdik sharalary týraly túsindirýińiz kerek. Odan keıin ózińiz qyr-syryn biletin, qadaǵalaı alatyn nárselerdi ǵana kórýge ǵana ruqsat etýińiz kerek», - deıdi Ortalyq Azııadaǵy, TMD jáne Baltyq elderindegi Kasperskıı zerthanasynyń basqarýshy dırektory Evgenıı Pıtolın.

«Qazaqstan ınternet qaýymdastyǵy» ZTB prezıdenti Shavkat Sabırov qaýipsiz, zııansyz bolyp kórinetin mobıldik qosymshalar shyn máninde balany ózine elitip, táýeldi etip tastaýy múmkin ekenin aıtty.

«Áleýmettik jelide ata-analar balasy dalaǵa shyǵyp ketkenin, úıde kompıýteri qosylyp qalǵanyn, balasynyń ne kórip otyrǵanyn bilý úshin kompıýterdi aqtaryp kórýge bola ma eken dep keńes surap otyrady. Kóbi balanyń quqyǵyn buzýǵa bolmaıtynyn, jeke keńistigine ótpeý týraly keńes berse, keıbiri ol jeke keńistikke ótý emes, balaǵa janashyrlyq ekenin jazady. Áleýmettik jeliler arqyly balaǵa qandaı qaýip tónýi múmkin ekeni týraly kóp aıtylyp, kóp jazylýy kerek. Bul turǵyda memlekettiń qoldaýy asa qajet. Koronavırýs indetinen qorǵanǵandaı, kıberkeńistikke de ózine tán maska men sanıtaızeri, ıaǵnı qorǵanys quraldary bolýy kerek», - deıdi ol.