Zııankesterden qorǵaýdyń jańa bıologııalyq tehnologııasy ázirlendi
ASTANA. KAZINFORM – Bolashaqta bul tehnologııany dálme-dál eginshilik júıelerinde, sondaı-aq fıtosanıtarııalyq monıtorıng tehnologııalarymen qatar qoldanýǵa bolady.
J. Jıembaev atyndaǵy Qazaq ósimdikterdi qorǵaý jáne karantın ǵylymı-zertteý ınstıtýtynyń ǵalymdary entomofagtardy ushqyshsyz ushý apparattarynyń kómegimen avtomattandyrylǵan túrde taratý tehnologııasyn ázirledi. BioDrop dep atalatyn bul tehnologııa jumys júrgizý ýaqytyn 4–6 esege qysqartýǵa jáne aýyl sharýashylyǵy daqyldaryn qorǵaýdyń bıologııalyq tıimdiligin arttyrýǵa múmkindik beredi.
— Keshen quramyna bıoydyraıtyn BioDrop sferalyq kapsýlalary, olardy taratýǵa arnalǵan arnaıy qurylǵy jáne ushqyshsyz ushý apparaty kiredi.
Kapsýlalardyń ishine aýyl sharýashylyǵy zııankesteriniń tabıǵı jaýlary sanalatyn entomofagtardyń bıologııalyq materıaly ornalastyrylady. Atap aıtqanda, tehnologııada Trichogramma spp. jáne Habrobracon hebetor sııaqty entomofagtar paıdalanylady.
Ushqyshsyz ushý apparatyna tıelgen kapsýlalar aldyn ala belgilengen baǵyt boıynsha egistik alqabyna avtomatty túrde taratylady. Kapsýlalar egistik betine túskennen keıin olardyń ishinen entomofagtar birtindep bosap shyǵyp, zııankesterdi izdep, joıa bastaıdy, — delingen AShM habarlamasynda.
Kapsýlalardyń sferalyq pishini mólsherleý mehanızminiń erekshelikteri jáne olardyń quramyndaǵy bıologııalyq materıaldyń ómirsheńdigin saqtaý qajettiligi eskerile otyryp daıyndalǵan.
Júrgizilgen dalalyq synaqtar BioDrop tehnologııasynyń entomofagtardy dástúrli qolmen taratý ádisimen salystyrǵanda bıologııalyq tıimdiligi joǵary ekenin kórsetti.
Olar taratylǵannan keıingi 14-táýlikte dástúrli ádis boıynsha bıologııalyq tıimdilik orta eseppen 70–73% bolsa, BioDrop tehnologııasyn qoldanǵanda bul kórsetkish 81–83%-ǵa jetken.
Osylaısha, jańa tehnologııany qoldaný dástúrli ádispen salystyrǵanda bıologııalyq tıimdilikti orta eseppen 10–11 paıyzdyq tarmaqqa arttyrǵan.
Sonymen qatar jumystardy júrgizýge jumsalatyn ýaqyt ta aıtarlyqtaı qysqarady. Qolmen taratý kezinde zerttelgen ýchaskedegi jumystarǵa 1–1,5 saǵat jumsalsa, ushqyshsyz ushý apparatyn paıdalaný kezinde jabdyqty daıyndaýdy qosa alǵanda, dál osyndaı jumys kólemi 10–15 mınýtta oryndalǵan.
Bul egistikterdi bıologııalyq qorǵaý jumystaryn, sonyń ishinde úlken aýmaqtarda jáne barýy qıyn ýchaskelerde, áldeqaıda jyldam júrgizedi.
Qazirgi ýaqytta tehnologııa tórt sharýashylyqta engizilip, qoldanylyp keledi. Bul ázirlemeniń aýyl sharýashylyǵy daqyldaryn zııandy organızmderden qorǵaý maqsatynda is júzinde qoldanýǵa bolatyndyǵyn kórsetedi.
Bolashaqta bul tehnologııany dálme-dál eginshilik júıelerinde, sondaı-aq fıtosanıtarııalyq monıtorıng tehnologııalarymen qatar qoldanýǵa bolady.
Entomofagtardy paıdalaný ósimdikterdi qorǵaýdyń ekologııalyq qaýipsiz ádisterin damytýǵa jáne aýyl sharýashylyǵynda bıologııalyq qorǵaý quraldaryn qoldaný aıasyn keńeıtýge jol ashady. Entomofagtardy taratýdyń avtomattandyrylǵan tehnologııalaryn engizý mundaı is-sharalardy jedel ári tıimdi júrgizýge qosymsha múmkindik beredi.
Aıta ketelik qazaqstandyq agrosala mamandary Qytaıda zamanaýı tehnologııalardy úırenetini týraly jazǵan edik.
