Zııandy óndiriste 25 jyl jumys istegenderge zeınetaqy tólenýi múmkin

ASTANA. QazAqparat – QR Eńbek jáne halyqty áleýmettik qorǵaý mınıstri Tamara Dúısenova zııandy eńbek jaǵdaıynda 25 jyl jumys istegenderge zeınetaqy berilýi múmkin ekenin aıtty, dep habarlaıdy QazAqparat tilshisi.

Búgin Májiliste tilshiler mınıstrden zııandy óndiriste isteıtin jumysshylardy zeınetke erte shyǵarý máselesi jaıynda suraq qoıdy.

«Bul salaǵa mınıstrlik tıisti usynystaryn joldady. Jalpy medıtsınalyq túsiniktemelerge qarasaq, eger azamat 25 jyl boıy aýyr jumysta istese, olardyń kásibı jumysqa qabilettiligi tómendeıdi. Atap aıtqanda, 25 jyl eńbek ótili bolsa, osy salada eki máseleni qarastyryp otyrmyz», - dedi T. Dúısenova.

Onyń aıtýynsha, bul turǵyda jumys berýshilerdiń mindetti kásibı zeınetaqy jarnalary esebinen birden zeınetaqy tóleý qarastyrylyp otyr. Osy baǵytta eńbek ótili eskeriledi. Ekinshiden, jumysshy kásibı eńbek etý qabiletin 5-ten 30 paıyzǵa deıin joǵaltsa, sol kásibı zeınetaqyǵa qosymsha saqtandyrý qorynyń qarajatynan tólem jasaý máselesi pysyqtaldy.

«Sonymen qatar, memleket jaǵynan zııandy óndiriste jumys istegen adamdardy qoldaýdyń úsh deńgeıli áleýmettik qamtamasyz etý máselesi boıynsha usynys jasaldy. Qazir saqtandyrý kompanııalarynyń esep-qısabyn kútip otyrmyz. Taıaý kúnderi bul kompanııalardyń eseptep shyqqan derekterin qarastyramyz», - dedi mınıstr.

Budan buryn habarlanǵandaı, bıyl zııandy eńbek jaǵdaıynda jumys isteıtinderdi áleýmettik qorǵaý tásilderi ázirlendi.