Zııandy eńbek jaǵdaılarynda jumys isteıtin qyzmetkerlerdiń eń kóbi Pavlodar oblysynda belgilendi
ASTANA. 14 mamyr. QazAqparat - Zııandy jáne basqa da qolaısyz eńbek jaǵdaılarynda jumys isteıtin qyzmetkerlerdiń sany týraly aqparatty alý maqsatynda Qazaqstan Respýblıkasy Statıstıka agenttigi ekonomıkalyq qyzmettiń jekelegen túrlerindegi kásiporyndar men uıymdarǵa jyl saıyn zertteý júrgizedi. Zertteý aýyl, orman jáne balyq sharýashylyǵy, ónerkásip, qurylys, kólik jáne baılanys, densaýlyq saqtaý, ǵylym jáne qyzmet kórsetý salasynda jumys istegen qyzmetkerlerdi qamtıdy.
«2012 jylǵy zerttelgen kásiporyndar qyzmetkerleriniń sany 1754,4 myń adamdy, áıelder - 684,8 myńdy (39,0%) qurady. Belgilengen uıǵaryndy normalarǵa jaýap bermeıtin qolaısyz eńbek jaǵdaılarynda, osy qyzmet túrlerinde 368,8 myń adam jumys isteıdi, ıaǵnı olardyń úlesi 21,0% qurady. Sonyń ishinde shýdyń jáne dirildiń joǵary deńgeıi jaǵdaıynda 142,5 myń adam (38,6%), ShUK-dan (shekteýli uıǵaryndy kontsentratsııadan) asatyn jumys aımaǵyndaǵy aýanyń gazdanýy men shańdanýy áserinde - 136,2 myń adam (36,9%) jáne qolaısyz temperatýralyq rejımde - 65,9 myń adam (17,9%) eńbektengen. Aýyr dene eńbegimen shuǵyldanǵandar 71,2 myń adam (barlyq jumys isteıtinderden 4,1%)»,-delingen QR Statıstıka agenttiginiń málimetinde.
Zııandy eńbek jaǵdaılarynda jumys isteıtin qyzmetkerlerdiń eń kóp sany ónerkásip salasynda belgilengen - 242,4 myń adam, óńdeý ónerkásibi salasynda olardyń sany 110,8 myń adamdy qurady (ónerkásip salasyndaǵy qyzmetkerlerdiń jalpy sanynan 45,7%). Barlyq zerttelgen qyzmetterde sanıtarlyq-gıgıenalyq talaptarǵa jaýap bermeıtin zııandy eńbek jaǵdaılarda jumys isteıtin erlerdiń sany áıelderdiń sanynan orta eseppen 2,0 eseden 23,5 esege deıin artty. Zııandy jaǵdaılarda jumys isteıtin áıelderdiń sany erler sanynan kelesi salalarda ǵana arttyq boldy: densaýlyq saqtaý (4,6 ese), tamaqtaný boıynsha qyzmetter (11,3 ese) salalary.
Sanıtarlyq-gıgıenalyq talaptarǵa saı kelmeıtin jaǵdaılarda áıelder arasynda árbir jetinshi (90,7 myń adam) jumys istedi, onyń ishinde 23,6% (21,4 myń adam) gazdanǵan jáne shańdanǵan ortada eńbektendi.
Sanıtarlyq-gıgıenalyq talaptarǵa jaýap bermeıtin zııandy eńbek jaǵdaılarynda jumys isteıtin qyzmetkerler sanynyń eń kóbi Pavlodar oblysynda belgilendi, zerttelgen ekonomıkalyq qyzmet túrleri boıynsha osy oblystaǵy qyzmetkerlerdiń jalpy sanynan olardyń úles salmaǵy 40,0% qurady, Qaraǵandy oblysynda olardyń úles salmaǵy 37,7% qurady, Mańǵystaý oblysynda - 35,4%, Shyǵys-Qazaqstanda - 26,4%. Sanıtarlyq-gıgıenalyq talaptarǵa jaýap bermeıtin zııandy eńbek jaǵdaılarda jumys isteıtin qyzmetkerlerdiń eń az úles salmaǵy Soltústik Qazaqstan (7,1%) jáne Batys Qazaqstan (4,7%) oblystarynda belgilendi.
2012 jyly kásiporyndar zııandy jáne qolaısyz eńbek jaǵdaılaryndaǵy basqa da jumysy úshin arnalǵan ótemaqylar men jeńildikterge 78 382,2 mln. teńge jumsady. Jeńildiktiń kóp taraǵan túri - qosymsha demalys 516,3 myń adamǵa berilgen, zııandy jáne jáne basqa da qolaısyz eńbek jaǵdaıyna arnalǵan ártúrli materıaldyq qosymsha tólemderdi 366,6 myń adam paıdalanǵan, 306,6 myń adam - sút nemese teń baǵaly taǵam ónimderin tegin aldy, 76,6 myń adam - tegin emdik-profılaktıkalyq tamaqtanýmen qamtamasyz etildi, al 61,0 myń adam - qysqartylǵan jumys kúninde jumys istegen.
