Zııandy aqparattan balalardy zańmen qorǵaý ulttyq jáne memlekettik paryz - A. Smaıyl
ASTANA. 23 sáýir. QazAqparat - Zııandy aqparattan balalardy zańmen qorǵaý ulttyq jáne memlekettik paryz.
Búgin Májilistiń Áleýmettik-mádenı damý komıtetiniń kóshpeli otyrysynda «Balalardy densaýlyǵy men damýyna zardabyn tıgizetin aqparattan qorǵaý týraly» zań jobasynyń tanystyrylymy barysynda depýtat Aldan Smaıyl osylaı málim etti.
«Demokratııa qundylyǵyn túrlishe túsingen, ony qoǵammen qalypty ıgerý turǵysynan emes, óziniń jeke, keı rette qylmysqa parapar qareketteri úshin paıdalanýshylar aqparat álemin jaýlaı bastaǵany ras. Endeshe, zııandy aqparattan balalardy zańmen qorǵaý ulttyq jáne memlekettik paryz. Sondyqtan da bul máselege Ázirbaıjan, Belarýs, Tájikstan, Ýkraına parlamentteri aıyryqsha mán berýde. Reseı arnaıy zań qabyldaýmen shektelmeı, Federatsııa Prezıdenti janynan balalar quqyǵy jóninde ýákiletti keńes qurdy. Munyń negizgi maqsaty balalardyń densaýlyǵy men damýyna zııan keltiretin aqparattan qorǵaý týraly reseılik zańnamanyń oryndalýyn baqylaýǵa alý», - deıdi A. Smaıyl.
Depýtattyń aıtýynsha, dál osyndaı qadamdar Qyrǵyzstanda da júzege asa bastaǵan. «Endeshe Qazaqstanda atalǵan zań qabyldanǵan jaǵdaıda onyń oryndalýyn qadaǵalaıtyn ókiletti organ qurylsa ıgi. Tek sonda ǵana jas urpaqtyń tolyqqandy damýyna aıyryqsha yqpal ete alamyz», - dedi depýtat.
