Zııandy jaǵdaıda jumys istegender járdemaqy alý úshin stajy 7 jyldan kem bolmasyn degen aqparat jalǵan

Eńbek jáne halyqty áleýmettik qorǵaý mınıstrligi málimdeme jasady. Vedomstvo málimetinshe, zııandy jaǵdaıda jumys istegeni úshin arnaıy áleýmettik tólem taǵaıyndaıtyn eńbek ótili týraly aqparat shyndyqqa janaspaıdy, dep habarlaıdy QazAqparat.  

«BAQ-ta, messendjer men áleýmettik jelilerde tarap jatqan zııandy jaǵdaıda jumys istegen azamattar úshin aldaǵy ýaqytta 55 jastan bastap taǵaıyndalatyn arnaıy áleýmettik tólem úshin 7 jyl ótili bolý kerek degen aqparat jalǵan. Eńbek jáne halyqty áleýmettik qorǵaý mınıstrligi 22 qyrkúıekte Premer-Mınıstrdiń orynbasary Tamara Dúısenovadan 55 jastap bastap zııandy jaǵdaıda jumys istegeni úshin arnaıy áleýmettik tólem taǵaıyndaý boıynsha saýalyna bergen jaýaby jýrnalısterdiń salǵyrttyǵynan buqaralyq aqparat quraldarynda jáne áleýmettik jelilerde shyndyqqa janaspaıtyn aqparat retinde tarap otyr» dep málimdedi mınıstrlik.

BAQ-ta taraǵan aqparatta «zııandy jaǵdaıda jumys istegeni úshin eńbek ótili 7 jyldan kem bolmaýy kerek» dep kórsetilgen.

Vedomstvo aıtýynsha, jýrnalısterdiń bul aqparaty — máseleni tolyqqandy bilmeýiniń saldary. 

Qazirgi tańda arnaıy áleýmettik tólem taǵaıyndaý úshin usynylatyn sharttardyń biri retinde jumys berýshiniń Biryńǵaı jınaqtaýshy zeınetaqy qoryna 7 jyldan kem emes mindetti kásibı tólemniń bolýy qarastyrylyp jatyr. 

«Búgingi kúni múddeli memlekettik organdarmen, jumysshylar men jumys berýshilerdiń ókilderimen birlesip, osyǵan qatysty tásilderdiń qarastyrylyp jatqanyn habarlaımyz. Ázirlengen tásilder boıynsha aqparat qosymsha habarlanady» deıdi Eńbekmın.