Zııandy taǵamdarǵa qosymsha salyq engizý kerek - depýtat
ASTANA. KAZINFORM – Búgin Senattyń jalpy otyrysynda depýtat Bıbigúl Jeksenbaı balalar taǵamynyń sapasyna qatysty kemshilikterdi aıtty. Bul rette ol Úkimet basshysy Álıhan Smaıylovtyń atyna saýal joldady.
Depýtattyń aıtýynsha, keıingi kezde shyǵý tegi belgisiz azyq-túlik pen taýarlar elimizde qaptap ketken. Eń qorqynyshtysy, olardyń bir bóligi memleket tekseretin jáne azyq-túlik qaýipsizdigin qatań saqtaıtyn iri zaýyttarda emes, kóshede jáne jertólede jasalýy múmkin.
«Elimizdiń arnaıy zańdaryna sáıkes, ár ónimde qazaq nemese orys tilderinde shyǵarýshy týraly, quramy, paıdalaný merzimi týraly aqparat bolýy tıis. Alaıda, dúken men bazarlarda saýdalanatyn baǵasy arzan, kózdiń jaýyn alatyn zııandy taǵamdar boıynsha osy talaptardyń oryndalýyna baqylaý bar ma?», - dedi senator.
Sonymen qatar B. Jeksenbaı elimizde balalarǵa arnalyp jarnamalanǵan azyq-túliktiń 72 paıyzy Dúnıejúzilik densaýlyq saqtaý uıymy tyıym salǵan ónimderge jatatyndyǵyna nazar aýdardy.
Senator elimizde zııandy taǵamdardy satýǵa tyıym salý, standarttaý jáne sertıfıkattaý qyzmetin qatań baqylaýǵa alý qadamdaryn usyndy.
«Zııandy taǵamdarǵa, qanty kóp energetıkalyq túrli sýsyndarǵa «qoǵam densaýlyǵyn qoldaýǵa arnalǵan qosymsha salyq» salýdy qarastyrý kerek», - dedi depýtat.
