Zııandy óndiristegi azamattarǵa beriletin tólem 85 myń teńgeden kem bolmaıdy
Eńbek jáne halyqty áleýmettik qorǵaý vıtse-mınıstri Aqmádı Sarbasov aýyr jáne zııandy óndiriste jumys isteıtin azamattarǵa berilýi múmkin arnaıy áleýmettik tólemniń kólemi 85 myń teńgeden kem bolmaıtynyn aıtty, dep habarlaıdy QazAqparat tilshisi.
Vıtse-mınıstr Eńbek kúnine arnalǵan forýmnyń aldynda BAQ ókilderine aýyr jáne zııandy óndiriste jumys isteıtin azamattarǵa tólenetin arnaıy áleýmettik tólemniń somasy qansha bolýy múmkin ekenin aıtty.
«Bul jerdegi bazalyq krıterıı – 55 jas. Ol týraly Prezıdent te aıtty. Ol úshin bizge adamnyń zııandy eńbek jaǵdaıynda jumys istegen eńbek ótilin anyqtap alýymyz kerek. Qazir biz onyń eńbek ótilin mindetti kásibı zeınetaqy salymy arqyly rastaı alamyz. ıAǵnı, aqparat júıesindegi jumys berýshi aýdarǵan zeınetaqy tólemderiniń merzimi jeti jyldan kem bolmaýy kerek. Biz osy ólshemshartty shekti mólsher dep belgileıtin shyǵarmyz. Bul arnaıy áleýmettik tólemdi iske qosatyn bazalyq krıterıı bolady», - dedi ol.
Aqmádı Sarbasov arnaıy tólem birneshe kózden alynatynyn eske saldy.
«Bul respýblıkalyq bıýdjet te, ómirdi saqtandyrý kompanııalarynyń qarjysy da. Onyń ishinde jumys berýshiniń jumysshysyna aýdaratyn saqtandyrý syıaqysy da bar. Arnaıy tólemniń mólsheri áli pysyqtalady. Árıne, ol 85 myń teńgeden joǵary bolady», - dedi vıtse-mınıstr.
